ރާއްޖެ ވަޑައިގަތުމުގެ ދައުވަތު ފަލަސްތީނުގެ އިސްލާމިކް މިނިސްޓަރު ޑރ. މުޙައްމަދު މުޞްޠަފާ ނަޖުމު އަށް އަރުވައިފި އެވެ.
މި ދައުވަތު ފަލަސްތީނުގެ އިސްލާމިކް މިނިސްޓަރަށް އަރުވާފައިވަނީ، އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު ސަޢޫދީ ޢަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
ޝަހީމް ވިދާޅުވީ ފަލަސްޠީނުގެ އިސްލާމިކް މިނިސްޓަރާއެކު ބޭއްވި ބައްދަލުވުމުގައި އެމަނިކުފާނު ރާއްޖެ ވަޑައިގެން، އިސްލާމީ މަރުކަޒުގައި ހުތުބާއެއް ދެއްވުމަށް ދައުވަތު އަރުވާފައިވާނެ ކަމަށެވެ.
"އިންޝާﷲ އެމަނިކުފާނު ރާއްޖެ ވަޑައިގަންނަވާނެ،" ޝަހީމް ވިދާޅުވި އެވެ.
ފަލަސްޠީނުގެ އިސްލާމިކް މިނިސްޓަރ ޑރ. މުޙައްމަދު މުޞްޠަފާ ނަޖުމުއާ ބައްދަލުކުރުން: އަޅުގަނޑުވާނީ އެމަނިކުފާނު ރާއްޖެވަޑައިގެން، އިސްލާމީ މަރުކަޒުގައި ޚުޠުބާއެއް ދެއްވުމަށް ދަޢުވަތު އަރުވާފަ. އިންޝާ ﷲ އެމަނިކުފާނު ރާއްޖެވަޑައިގަންނަވާނެ. pic.twitter.com/0vMENnpB1p
— Mohamed Shaheem Ali Saeed (@Mohamedshaheem1) August 4, 2024
ޝަހީމް ސައުދީ އަށް ވަޑައިގެންނެވީ މައްކާގައި ކުރިއަށް ގެންދަން ހަމަޖެހިފައިވާ އިސްލާމީ ގައުމުތަކުގެ އިސްލާމިކް މިނިސްޓަރުގެ 9 ވަނަ ކޮންފަރެންސްގައި ބައިވެރިވެވަޑައިގަތުމަށެވެ. މިއީ ސައުދީ ރަސްގެފާނު ސަލްމާނު ބިން ޢަބްދުލް ޢަޒީޒް އާލް ސުޢޫދުގެ އިސްނެންގެވުމުގެ މަތިން ބާއްވާ ކޮންފަރެންސެކެވެ.
މި ފަހަރުގެ ކޮންފަރެންސްގެ މައުޟޫއަކީ "މެދުމިނުގެ އުސޫލުތައް ކުރިއެރުވުމާއި، މެދުމިނުގެ އަގުތައް ވަރުގަދަކުރުމުގައި އިސްލާމިކް މިނިސްޓްރީތަކުގެ ދައުރު" އެވެ.
މި ކޮންފަރެންސްގައި ދުނިޔޭގެ 60 އަށް ވުރެ ގިނަ އިސްލާމީ ޤައުމުތަކުގެ ދީނީ ވުޒާރާތަކުގެ ވަޒީރުންނާއި، މުފްތީންނާއި، އިސްލާމީ މަޖިލިސްތަކާއި، މުއައްސަސާތަކާއި، ޖަމްޢިއްޔާތަކުގެ ރައީސުން ބައިވެރިވެ ވަޑައިގަންނަވަ އެވެ.