ހުޅުމާލޭގައި މިދިޔަ ބުރަ ދުވަހު ބާރު ސްޕީޑްގައި ދުއްވި ސްޕޯޓްސް ކާރަކުން ޖެހި ބޮޑެތި އަނިޔާތަކެއް ލިބުނު ޒުވާނާ އިތުރު ފަރުވާ އަށް ރާއްޖެ އިން ބޭރަށް ގެންދަން މަސައްކަތް ކުރަމުން އަންނަ ކަމަށް އާއިލާ އިން ބުނެފި އެވެ.
އެ ހާދިސާއާ ގުޅިގެން 23 އަހަރުގެ ޒުވާނާ އަށް އައިޖީއެމްއެޗްގައި ފަރުވާ ދެމުން އަންނަ އިރު، އޭނަގެ ހާލު މިހާރު ސްޓޭބަލް ކަމަށް އާއިލާ އިން ބުންޏެވެ. އާއިލާ އިން ބުނި ގޮތުގައި އޭނަ ރާއްޖެ އިން ބެރަށް ގެންދަނީ މޫނުގެ ކަށިތަކަށް ލިބިފައިވާ ގެއްލުންތަކަށް ރާއްޖެ އިން އޮޕަރޭޝަން ކުރެވެން ނެތުމުންނެވެ.
އެ ޒުވާނާ އަށް އަނިޔާވީ ސައިކަލެއްގެ މަތީގައި މަޑިކޮށްލައިގެން އިންދައި ބާރު ސްޕީދްގައި ދުއްވާފައި ދިޔަ ސްޕޯޓްސް ކާރު ކޮންޓްރޯލް ނުވެ ގޮސް އޭނަގެ ގައިގައި ޖެހިގެންނެވެ. އާންމުވެފައިވާ އެ ހާދިސާގެ ވީޑިއޯ އިން ފެންނަ ގޮތުގައި ކާރުން ޖެހި ޒުވާނާ ވަރަށް ބާރަށް ވިއްސައިގެންދާ ތަން ފެނެ އެެވެ. އަދި ސައިކަލު ކައިރީގައި ހުރި ގަހެއް ވެސް ބިންދައިގެން ވެއްޓޭ މަންޒަރު ވީޑިއޯ އިން ފެނެ އެވެ.
އެ ހާދިސާ އަށް ފަހު ކާރުގައި ތިބި މީހުން ފިލައިގެން އުޅެނިކޮށް ބުދަ ދުވަހުގެ ރޭ ވަނީ ހައްޔަރުކޮށްފަ އެވެ. ކާރުގައި ތިން މީހަކު ތިއްބެވެ. އެކްސިޑެންޓްވި ހާދިސާގައި ކާރަށް ބޮޑެތި ގެއްލުންތަކެއްވެފައިވެ އެވެ.