ރާއްޖެ އިން މިހާރު އެމެރިކައާ އެކީ އެއްވެސް ގުޅުމެއް ބޭއްވުމަކީ ބަލައިގަނެވޭނެ ކަމެއް ނޫން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި އޭނަ މިއަދު ވިދާޅުވީ ފަލަސްތީނުގައި އިޒްރޭލުން މިހާރު ހިންގަމުންދާ ގަތުލުއާންމަށް އެންމެ ބޮޑަށް ވާގިދީ، އެހީތެރިވާ ގައުމަކީ އެމެރިކާ ކަމަށެވެ. އެގޮތުން ގާޒާ ފުނޑައިލައި އެތައް ހާސް ބަޔަކު ޝަހީދުކޮށްލީ އެމެރިކާ އިން ދީފައިވާ ހަތިޔާރުން ކަމަށާއި އެފަދަ ބަޔަކާ އެކީ ރާއްޖެ އިން އެއްވެސް ކަހަލަ ގުޅުމެއް ބޭއްވުމަކީ ސަރުކާރުން ކޮށްގެން ވާނެ ކަމެއް ނޫން ކަމަށް އުމަރު ވިދާޅުވި އެވެ.
އޭނަ ވިދާޅުވީ ހަމާސްގެ ލީޑަރެއް ކަމަށްވާ އިސްމާއީލް ހަނިއްޔާ އަވަހާރަކޮށްލުން ކުށްވެރިކޮށް އެއްޗެއް ވިދާޅުވާން ރައީސް ޑރ. މުހައްމަދު މުއްޒަށް ކެރިވަޑައިނުގަތިމާއި އިޒްރޭލޔގެ ޕާސްޕޯޓް ވެސް މަނާކުރަން ރާއްޖެ އަށް ނުކެރިގެން އުޅެނީ އެމެރިކާ ދެކެ ބިރުން ކަމަށެވެ. އަދި ސައްތަ އިން ސައްތަ ގައުމެއްގެ ގޮތުގައި ރާއްޖެ އޮވެ، އެފަދަ ނިންމުންތަކެއް ނިންމަން ނުކެރުމަކީ މި ސަރުކާރުގެ "ފޭކް" ކަން ދައްކުވައުދޭ ކަމެއް ކަމަށް ވިދާޅުވި އެވެ.
"އަަޅުގަނޑު ރާއްޖޭގެ ވެރިކަމުގައި ހުރި ނަމަ މިހާރުން މިހާރަށް އެމެރިކާއާ އޮތް ހުރިހާ ގުޅުޅުމެއް ކަނޑައިލީމުސް." އުމަރު ވިދާޅުވި އެވެ.
އޭނަ ވިދާޅުވީ އެމެރިކާ ނުރުހިދާނެތީ ސަރުކާރަށް ކަމެއް ކުރަން ނުކެރިގެން އުޅެނީ އެ މީހުންގެ އަތުން ފައިސާތަކެއް ؛ލިބިދާނެކަމުގެ އުންމީދުގައި ކަމަށެވެ. އެކަމަކު އެފަދަ އެހީއެއް ވެސް ނުލިބޭނެ ކަމަށް އުމަރު ވިދާޅުވި އެވެ.
އުމަރު ސިފަކުރެއްވި ގޮތުގައި ރާއްޖެ މިހާރު އޮތީ އިންޑިއާ އާއި އެމެރިކާގެ ނުފޫޒުގެ ދަށުގަ އެވެ.