ޝޫޓިން ނިމުމަކާ ހަމައަށް އައިސްފައިވާ ދަ "ބްލަފް" ގެ ޝޫޓިންގެ ތެރެއިން ލެޔާ އެކީ ފެންނަ ފޮޓޯތަކެއް ބަތަލާ ޕްރިޔަންކާ ޗޯޕްޅާ ހިއްސާކޮށްފި އެވެ.
އިންސްޓަގްރާމްގައި އޭނަ މިއަދު އާންމުކުރި ޕޯސްޓެއްގައި ބުނީ މިއީ ފިލްމުގެ ސެޓުން ނަގާފައިވާ ފޮޓޯތަކެއް ކަމަށާއި އޭގައި ފެންނަނީ މޭކަޕާ އެކީގައި ކަމަށެވެެ. އަދި ހަފުތާގެ ތެރޭގައި "ބްލަފް" ގެ ޝޫޓިން ނިމޭނެ ކަމަށް ވެސް ޕްރިޔަންކާ ބުންޏެވެ.
އެ ފިލްމުގެ ޝޫޓިން ޖޫން މަހުން ފެށިގެން ކުރިއަށް ދަނީ އޮސްޓްރޭލިއާގަ އެވެ. ޕްރިޔަންކާ ކަނޑުފޭރޭ މީހެއްގެ ރޯލުން ފެންނާނެ "ދަ ބްލަފް" އަކީ އެމެޒޯން ޕްރައިމް ވީޑިއޯ އިން މިދިޔަ އަހަރުގގެނެސ ދިން އޭނަގެ ވެބް ސީރީޒް "ސިޓަޑެލް" ގެ ޓީމް ކަމަށްވާ ޖޯ އާއި އެންތަނީ ރުސޯ ޕްރޮޑިއުސްކޮށް، ފްރޭންކް އީ ފްލާވާސް ޑައިރެކްޓްކުރާ ފިލްމެކެވެ.
ފްރޭންކް އަކީ މި އަހަރުގެ ފެބްރުއަރީގައި ރިލީޒްކުރި، މިއުޒިކް ލެޖެންޑް ބޮބް މާލީގެ ބައޮގްރަފިކަލް ޑްރާމާ "ބޮބް މާލީ: ވަން ލަވް" ގެ އެއް ސްކްރީން ރައިޓަރެވެ.
ޕްރިޔަންކާއާ އެކީ "ދަ ބްލަފް" ގެ ކާސްޓްގައި ކާލް އާބަން ވެސް ހިމެނެ އެވެ.
މި ފިލްމުގެ ޝޫޓިން ނިމުމަކާ ގާތްވެފައިވާ އިރ، ޕްރިޔަންކާ ވަނީ މެއި މަހުގެ ތެރޭގައި "ހެޑްސް އޮފް ސްޓޭޓް" ގެ ޝޫޓިން ވެސް ނިންމައިފަ އެވެ. އޭގެ ބަތަލުންނަކީ އިޑްރިސް އެލްބާ އާއި ޖޯން ސީނާ އެވެ.
ޕްރިޔަންކާގެ އެންމެ ފަހުގެ ފިލްމަކީ މިދިޔަ އަހަރުގެ "ލަވް އެގެއިން" އެވެ.