މޯލްޑިވް ގޭސް ޕްރައިވެޓް ލިމިޓެޑްގެ ކުރީގެ މެނޭޖިންގ ޑިރެކްޓަރ އަބްދުﷲ މައުމޫނު (ގޭސް މާނު) ރާއްޖެ އައުމުން ފުރުން މަނާކޮށް، ތުހުމަތު ކުރެވޭ މަނީލޯންޑްރިން މައްސަލަ ތަހުގީގު ކުރަން ފަށައިފިއެވެ.
ފުލުހުން މިއަދު ބުނެފައިވަނީ މައުމޫންގެ މައްޗަށް ތުހުމަތު ކުރެވޭ މަނީލޯންޑްރިން މައްސަލަ ތަހުގީގު ކުރަމުން ގެންދާ ކަމަށެވެ.
މައުމޫންގެ މައްޗަށް މި ތުހުމަތު ކުރެވެނީ މޯލްޑިވް ގޭސްގެ އެމްޑީގެ މަޤާމުގައި އަބްދުﷲ މައުމޫން ހުރި ދުވަސްވަރު އެކުންފުންޏަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމުގެ މުއާމަލާތުގެ ތެރޭގައި ރިޝްވަތުނަގާ ހިޔާނާތްތެރިވެފައިވާ މައްސަލައިގައެވެ.
އޭސީސީން މީގެކުރިން ބުނެފައިވަނީ މައުމޫން ރިޝްވަތުގެ ގޮތުގައި ޖުމްލަ 3,106,189.38 ނަގާފައިވާކަން ތަހްޤީޤަށް ހޯދާފައިވާ ކަމަށެވެ. އަދި އެ ފައިސާ އޭނާއާ ގުޅުން އޮންނަކަމަށް ތުހުމަތު ކުރެވޭ އަދި އޭނާގެ އާއިލީ ބައެއް ފަރާތްތަކާއި ގުޅުން އޮންނަކަމަށް ތުހުމަތުކުރެވޭ ބައެއް ކުންފުނިތަކަށް ޖަމާކޮށްފައިވާ ކަމަށްވެސް އޭސީސީން ބުނެފައިވެއެވެ.
މި މައްސަލާގައި މައުމޫންގެ މައްޗަށް ޕީޖީން ވަނީ ރިޝްވަތު ހިފުމުގެ ކުށުގެ 7 ދައުވައެއް ކޮށފައެވެ. އަދި މި މައްސަލައިގައި ހިމެނޭ 3.1 މިލިއަން ރުފިޔާ އަނބުރާ ހޯދުމަށްވެސް އޭސީސީން ވަނީ ނިންމާފައެވެ.