އައްޑޫގެ އާންމު ތަންތަނާއި މަގުމަތީގައި އިއުލާނާއި އިޝްތިހާރު ހަރުކުރުމާ ބެހޭ އުސޫލަށް މިއަދުން ފެށިގެން އަމަލު ކުރަން ފަށައިފި އެވެ.
ކައުންސިލުން މިއަދު ބުނީ އާންމު ތަންތަނާއި މަގުމަތީގައި އިޢުލާނާއި އިޝްތިހާރު ހަރުކުރުމާ ބެހޭ އުޞޫލަށް އަމަލު ކުރަން މިދިޔަ މަހުގެ 17 ގައި ކައުންސިލުން ފާސްކޮށްފައިވާތީ މިއަދުން ފެށިގެން އު އުސޫލަށް އަމަލު ކުރުމަށް ފަށާފައިވާކަން އާއްމުކޮށް އަންގައި އިޢުލާންކުރާ ކަމަށެވެ.
އުސޫލަށް އަމަލު ކުރަން ފަށައި، އުސޫލު އާންމު ވެސް ކޮށްފައިވެ އެވެ.
އުޞޫލަށް ޢަމަލުކުރަންފެށުމާ ގުޅގެން މި އަހަރުގެ 23 ޖެނިއަރީގައި ނެރެފައިވާ "އެކިއެކި ޙަރަކާތްތަކާއި ގުޅިގެން ރަށުތެރޭގައި ހަރުކުރެވޭ އިޝްތިހާރުތަކާބެހޭ އުސޫލު" އާއި މިދިޔަ މަހުގެ 23 ގައި އާންމުކުރި "އައްޑޫސިޓީގެ ޢާންމު ތަންތަނާއި މަގުމަތީގައި އިޢުލާނާއި އިޝްތިހާރު ހަރުކުރުމާ ބެހޭ އުޞޫލު" މިހާރު އުވުނީ ކަމަށް ކައުންސިލުން ބުންޏެވެ.
ކައުންސިލުން ބުނީ އާންމު ތަންތަނާއި މަގުމަތީގައި އިއުލާނާއި އިޝްތިހާރު ހަރުކުރުމާ ބެހޭ އުސޫލުގެ މަގުސަދަކީ އެފަދަ ތަންތަނުގައި އިޝްތިހާރު ހަރުކުރުމުގައި އަމަލު ކުރާނެ ގޮތްތައް ކަނޑައެޅުމާއި އުސޫލާ ހިލާފަށް އަމަލު ކުރާ ފަރާތްތަކާ މެދު އަޅާނެ ފިޔަވަޅު ކަނޑައެޅުމާއި އައްޑޫގައި ސާފު ވެއްޓެއް ގާއިމު ކުރުން ކަމަށެވެ.
ކައުންސިލުން ބުނީ މިއަދު އަމަލު ކުރަން ފެށި އުސޫލުގެ ކުރިން ދޫކޮށްފައިވާ ހުއްދަތަކުގެ ތެރެއިން މުއްދަތު ހަމަނުވާ ހުއްދަތައް އުސޫލަށް އަމަލު ކުރަން ފަށާތާ ތިން މަސްތެރޭގައި ބާތިލުވާނެ ކަމަށެވެ. އެކަމަކު ހުއްދަ އާކުރަން ބޭނުންވާ ނަމަ އަލުން ހުށަހެޅުމުގެ ފުރުސަތު އޮންނާނެ އެވެ.
އުސޫލުގައިވާ ގޮތުން ކައުންސިލްގެ ހުއްދަ ނެތި، ކައުންސިލްގެ އިހުތިސާސްގެ ތެރޭގައި ހިމެނޭ އެއްވެސް ތަނެއްގައި ވިޔަފާރީގެ ބޭނުމަށް އެއްވެސް ބާވަތެއްގެ އިއުލާނެއް އިޝްތިހާރެއް ބެހެއްޓުމަކީ މަނާކަމެކެވެ. އަދި ސަރުކާރުގެ އިމާރާތްތަކާއި އެފަދަ ތަންތަނުގެ މަގުފާރުތަކުގައި ވެސް އިއުލާނާއި އިޝްތިހާރު ހަރުކުރުން މަނާވާނެ އެވެ.