ރޭ ހިނގި ކަނޑުމަތީގެ ހާދިސާއެއްގައި އަނިޔާވި މީހަކަށް ފަރުވާ ދިނުމަށް ފ.ނިލަންދޫ ހޮސްޕިޓަލަށް ގެންގޮސްފިއެވެ.
ރާއްޖެ ސަރަހައްދުގެ މޫސުން ގޯސްވެ ރޭ ވަނީ ކަނޑުމަތީގެ 6 ހާދިސާއެއް ހިނގާފައެވެ.
އެމްއެންޑީއެފްއިން ބުނެފައިވަނީ އޭގެން އެއް ހާދިސާގައި، 80 ފޫޓްގެ ފާގަަތި ނަމަކަށް ކިޔާ ދޯންޏަށް ދިޔަވާތީ ސެންޓްރަލް އޭރިއާ ކޮމާންޑް ދ.ކުޑަހުވަދޫ ޕޯސްޓްގެ ސިފައިން ހަރަކާތްތެރިވެފައިވާ ކަމަށެވެ. އަދި ދޯނީގައި ހުރި ބިދޭސީ ފަޅުވެރިއަކަށް އަނިޔާވެ އިތުރުފަރުވާއަށް ފ.ނިލަންދޫ ހޮސްޕިޓަލަށް ގެންގޮސް ދިނުމަށް އެހީތެރިވެފައިވާ ކަމަށެވެ. އެގޮތުން ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާއެކު އެ މީހާ ނިލަންދޫއަށް ގެންގޮސްދީފައިވާ ކަމަށް ބުނެފައިވެއެވެ. އެމްއެންޑީއެފްއިން ބުނެފައިވަނީ މިހާދިސާގެ ރިޕޯތް ލިބިފައިވަނީ 05:00 ހާއިރު ކަމަށެވެ.
ދެން ހިނގާފައިވާ ކަނޑުމަތީގެ ހާދިސާތަކަށް ބަލާއިރު، 9 ފަތުރުވެރިންނާ 5 ފަޅުވެރިންނާއެކު ދަތުރުކުރި 'ކޮޅުލިޔާ' ނަމަކަށްކިޔާ ސަފާރީ ތިމަރަފުށި އެއަރޕޯޓް ބީޗަށް ލައްވެފައިވެއެވެ. މި މީހުން މިހާރު ތިބީ އެރަށު ގެސްޓްހައުސްއެއްގައި ކަމަށާއި އެއްވެސް މީހަކަށް އަނިޔާއެއް ނުލިބޭ ކަމަށް އެމްއެންޑީއެފްއިން މައުލޫމާތުދެއެވެ. މި ހާދިސާގެ ރިޕޯޓް ލިބިފައިވަނީ ރޭ 01:10 ހާއިރު ކަމަށް މައުލޫމާތު ދީފައިވެއެވެ.
ތ. އަތޮޅު ތެރެއިން ބާޖެއް ކަފު ޖަހައިގެން ދަތުރުކުރި ޓަގު ބޯޓެއް މޫސުން ގޯސްވެ ވައު ކަނޑައިގެން ގޮސްފައިވާ ކަމަށްވެސް އެމްއެންޑިއެފްއިން މައުލުމާތުދީފައިވެއެވެ. މިވަގުތު ބާޖު އޮތީ ގ. ގުރައިދޫ ކައިރިއަށް ބީހިފައި ކަމަށާއި ޓަގު ބޯޓް އޮތީ އެސަރަހައްދުގައި އެންކަރުކޮށްގެން ކަމަށް މައުލޫމާތުދެއެވެ. މިހާދިސާގެ ރިޕޯޓް ލިބިފައިވަނީ ރޭ 02:54 ހާާއިރު ކަމަށް އެމްއެންޑީއެފްއިން މައުލޫމާތުދެއެވެ. މީގެއިތުރުން 'ފިޝްމަން' ކިޔާ މަސް ދޯންޏެއް ލ. އަތޮޅަށް ދަތުރުކުރަނިކޮށް ލ. ހިތަދޫގެ 23 މޭލު ބޭރުން ދިޔަވާކަމަށް ރޭ 03:20 ހާއިރު ރިޕޯޓް ލިބިފައިވާ ކަމަށް ވެސް ބުނެފައިވެއެވެ. މިދޯނި މިހާރު ވަނީ މަޑުމަޑުން ދުއްވާފައި އައިސް ލ. ހިތަދޫ ބަނދަރަށް ވަދެފައި ކަމަށާއި މިހާދިސާގައި ހަރަކާތްތެރިވެފައިވަނީ ފާސްޓް އިންޓަރ ސެޕްޓަރ ކްރާފްޓް 'މާފަތް' ކަމަށް މައުލޫމާތު ދީފައިވެއެވެ.
މީގެއިތުރުން 6 މީހުންނާއެކު ދަތުރުކުރި 'ބިނާ ކާގޯ' ކިޔާ ސަޕްލައި ދޯންނެއް ލ. ހިތަދޫގެ 11 މޭލު ބޭރުން އިންޖީން ހުއްޓި ދިޔަވާތީ ރޭގެ 02:43 ހާއިރު ރިޕޯޓް ލިބިފައިވާ ކަމަށްވެސް އެމްއެންޑީއެފްއިން މައުލޫމާތުދެއެވެ. މިހާރު މިދޯނި އިތުރު ދޯންޏެއްގެ އެހީގައި ކަފުޖަހައިގެން ދަތުރު ކުރާ ކަމަށްވެސް މައުލޫމާތު ދީފައިވެއެވެ. އަދި 10 މީހުންނާއެކު ދަތުރުކުރި ސައުތު އެކްސްޕްރެސް ދޯންޏަށް ދިޔަވާތީ ސިފައިން އެހީތެރިކަން ފޯރުކޮށްދީފައިވާ ކަމަށާއި އެގޮތުން ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާއެކު މި ދޯނި ވަނީ މިއަދު ހެނދުނު 09:00 ހާއިރު ލ.މާމެންދޫ ބަނދަރަށް ވައްދާފައި ކަމަށް މައުލޫމާތު ދެއެވެ. މިހާދިސާގެ ރިޕޯޓް ލިބިފައިވަނީ ރޭ 02:48 ހާއިރު ކަމަށް އެމްއެންޑިއެފްއިން މައުލޫމާތުދެއެވެ.