ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް ދިން ބޮމުގެ ހަމަލާގެ މައްސަލައިގައި މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ތައްޔާރުކުރި އިންކުއަރީ ރިޕޯޓުގައި ހުރި ކަންކަން މިސަރުކާރުގެ ކަމާބެހޭ ފަރާތްތަކުގެ ސަމާލުކަމަށް ގެނައުމަށް އަލުން ގެންނަން އެކޮމިޓީން ނިންމައިފިއެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީގެ މިއަދުގެ ބައްދަލުވުމުގައި ވާހަކަ ދައްކަވަމުން ދިއްގަރު ދާއިރާގެ މެންބަރު އަހުމަދު ނާޒިމް ވަނީ މިފަހުން ސަލާމަކީ ހިދުމަތްތަކާބެހޭ ކޮމިޓީއަށް ނެޝަނަލް ކައުންޓާ ޓެރަރިޒަމްގެ ސެންޓަރުގެ ބޭފުޅުން ހާޒިރުކުރުމުން އެ ބޭފުޅުން ދެއްކި ބައެއް ވާހަކަތަކާ ގުޅޭގޮތުން ކަންކަން ސާފުކޮށްފައެވެ.
އެގޮތުން ޔުނިފޯމްއެޅި އިދާރާތަކުގެ މެދުގައި އިންޓެލިޖެންސާ ބެހޭ ކަންކަން ވިލަރެސް ކުރެވޭނެ ގޮތުގެ އިންތިޒާމެއް އަދިވެސް ހަމަޖެހިފައި ނެތްކަން ނެޝަނަލް ކައުންޓާ ޓެރަރިޒަމްގެ ސެންޓަރުގެ ބޭފުޅުން ފާހަގަކުރެއްވިކަން ނާޒިމް ފާހަގަ ކުރެއްވިއެވެ. މިކަމަކީ ރައީސް ނަޝީދަށް ދިން ބޮމުގެ ހަމަލާއާ ގުޅިގެން މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ތައްޔާރުކުރި އިންކުއަރީ ރިޕޯޓްގައި ކުރުމަށް ރެކޮމެންޑް ކޮށްފައިވާ ކަމެކެވެ.
ނާޒިމް ވިދާޅުވީ ކޮމިޓީން ތައްޔާރުކުރި އިންކުއަރީ ރިޕޯޓުގައިވެސް އެންމެ ބޮޑު ކަމެއްގެ ގޮތުގައި ފާހަގަ ކޮށްފައިވަނީ ކަންކަން ވިލަރެސް ކޮށްފައި ނެތުމެވެ. އެހެންކަމުން އެކަން މިސަރުކާރުގެ ކަމާބެހޭ ފަރާތްތަކުގެ ސަމާލުކަމަށް އަލުން ގެނައުމަށް އެދުވަހުވެސް ކޮމިޓީގެ މެންބަރުންގެ މެދުގައި ވާހަކަ ދެކެވުނުކަން ފާހަގަކުރައްވާ ނާޒިމް ވަނީ އެކަމާމެދު ކޮމިޓީގެ މުގައްރިރު ފިޔަވަޅެއް އަޅުއްވާފައިވޭތޯ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ސަލާމަތީ ހިދުމަތްތަކާބެހޭ ކޮމިޓީގެ މުގައްރިރު އަހުމަދު ސަލީމް ވިދާޅުވީ އެކަމުގައި ސިޓީ ލިޔެ ނިންމާފައިވާ ކަމަށާއި އެ ސިޓީ މިއަދު ފޮނުވާލެވޭނެ ކަމަށެވެ.
މިސަރުކާރުގެ ޑިފެންސް މިނިސްޓަރު ޣައްސާން މައުމޫން މިދިޔަ މަޖިލީހަށް ހާޒިރުކުރެވުނު ފަހަރެއްގައި މި ހަމަލާއާ ގުޅޭގޮތުން ސުވާލު ކުރުމުން ޣައްސާން ވަނީ ބޮމުގެ ހަމަލާއާ ގުޅިގެން ރައްޔިތުންގެ މަޖިލީހަށް ހިއްސާކުރާނެ އިތުރު މައުލޫމާތު އެބަހުރިކަން ހާމަކުރައްވާފައެވެ. ޣައްސާން ވިދާޅުވީ ރައީސް ނަޝީދަށް ދިން ބޮމުގެ ހަމަލާގެ މައްސަލަ ވަރަށް ގާތުން ބަލަމުން ގެންދަވާނެ ކަމަށެވެ. އަދި މިހާރު ފެނިފައިހުރި ކަންތައްތަކުގައި މި މައްސަލައިގައި ރައްޔިތުންގެ މަޖިލީހާ ހިއްސާކުރާނެ އިތުރު މައުލޫމާތު ދިފާއީ ވުޒާރާގައި އެބަހުރި ކަމަށްވެސް ޣައްސާން ވިދާޅުވިއެވެ. މި މައުލޫމާތުތައް އޭގެފަހުން ޣައްސާން ވަނީ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީއަށް ހިއްސާކޮށްފައެވެ.
މޭ 6 ވަނަ ދުވަހު ބޮމެއް ގޮއްވާލާ ރައީސް ނަޝީދަށް ދިން ހަމަލާގައި އެމަނިކުފާނަށް ބޮޑެތި އަނިޔާތަކެއް ލިބިވަޑައިގަތެވެ. އަދި އެ ހަމަލާއިން ލިބުނު ޒަހަމްތަކަށް ރާއްޖެއާއި ރާއްޖެއިން ބޭރުން ފަރުވާ ހޯއްދަވާފައިވެއެވެ.
ބޮމުގެ ހަމަލާއާ ގުޅިގެން ދައުވާ އުފުލާފައިވަނީ މުޖާޒް އަހުމަދު، ތަހުމީން އަހުމަދު، އަލީ ހައިޝަމް، ފަހުމީ އަލީ، އިސްހާގް އަދި މުހައްމަދު ނާޒިމްގެ މައްޗަށެވެ. މި ހަމަލާގައި ބޮން ގޮއްވާލި ވ. ތިނަދޫ، ހިޔާ، އަދުހަމް އަޙްމަދު ރަޝީދު ވަނީ ކުށަަށް އިއުތިރާފުވެފައެވެ. އެހެންކަމުން އޭނާގެ މައްޗަށް ކުށް ސާބިތުވެ ވަނީ 23 އަހަރުގެ ޖަލު ހުކުމެއް އިއްވާފައެވެ.