ބަންގްލަދޭޝްގެ ބޮޑުވަޒީރުގެ މަގާމުން ޝައިޚް ޙަސީނާ އިސްތިއުފާ ދެއްވައިފިއެވެ.
ބަންގްލަދޭޝްގެ ސަރުކާރުން ކަނޑައަޅާފައިވާ ވަޒީފާގެ ކޯޓާއާ ދެކޮޅަށް ކޮލެޖް ދަރިވަރުން ކުރަމުންދިޔަ މުޒާހަރާތައް އޮތީ ވަރަށް ބޮޑަށް ހޫނުވެފައެވެ.
ބޭރު މީޑިއާތަކުން ރިޕޯޓް ކޮށްފައިވާ ގޮތުގައި ހަސީނާ ވަނީ މަގާމުން އިސްތިއުފާ ދެއްވުމަށްފަހު ގައުމު ދޫކޮށް ފިއްލަވާފައެވެ. ހަސީނާ ދިރިއުޅުއްވާ ގަނޑުވަރަށް މުޒާހަރާގެ ބައިވެރިން ވަދެގަނެފައިވާ ކަމަށްވެސް ބޭރު މީޑިއާތަކުން ރިޕޯޓް ކޮށްފައިވެއެވެ.
ބަންގްލަދޭޝްގެ އާމީ ޗީފް ޓީވީ މެދުވެރިކޮށް ބުނެފައިވަނީ ބޮޑުވަޒީރު ޝައިޚް ޙަސީނާ އިސްތިއުފާ ދެއްވާފައިވާ ކަމަށެވެ. އަދި ގައުމު ހިންގުމަށް ވަގުތީ ސަރުކާރެއް ވަރަށް އަވަހަށް އެކުލަވާލާނެ ކަމަށެވެ.
މިދިޔަ މަހުން ފެށިގެން ބަންގްލަދޭޝްގައި ކުރިއަށްދާ މުޒާހަރާތަކުގައި 300 އަށްވުރެ ގިނަ މީހުން ވަނީ މަރާލާފައެވެ.
ދަރިވަރުން މުޒާހަރާ ކުރަމުންދަނީ ބަންގްލަދޭޝްގެ މިނިވަން ކަމަށް ކުރި ހަނގުރާމައިގައި ބައިވެރިވި އެގައުމުގެ ސިފައިންގެ އާއިލާތަކަށް ސަރުކާރުގެ ވަޒީފާތަކުގެ 30 ޕަސެންޓު ދޭންޖެހޭގޮތަށް ކަނޑައަޅާފައި އޮންނަ އޮތުމާ ދެކޮޅަށެވެ. އެގޮތަށް ކަނޑައަޅާފައި އޮތުމުން ކިޔަވައިގެން ނިކުންނަ ކުދިންނަށް ވަޒިފާ ހޯދުމުގައި ދަތިތަކާ ކުރިމަތިވެ އެކަމު ނުރުހުން ދަރިވަރުން އަންނަނީ ފާޅުކުރަމުންނެވެ.