ރާއްޖޭގައި ހެލިކޮޕްޓަރުގެ ހިދުމަތް ދޭނެ ބަޔަކު ހޯދަން ހުޅުވާލައިފި އެވެ.
ޓްރާންސްޕޯޓް މިނިސްޓްރީން މިއަދު ބުނީ އެކަމަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް (އީއައިއޯ) ހުށަހެޅުމުގެ ފުރުސަތު މި މަހުގެ 19 އާ ހަމައަށް ހުޅުވާލައިފަ އެވެ.
މިނިސްޓްރީން ބުނީ ހެލިކޮޕްޓަރުގެ ހިދުމަތް ދޭން ބަޔަކު ހޯދަނީ 10 އަހަރަށް ކަމަށެވެ. އަދި މިއީ ހެލިކޮޕްޓަރުގެ ހިދުމަތް އެއާ އެމްބިއުލާންސްގެ ގޮތުގައި އާއި ވިޔަފާރި އުސީލުން ރިސޯޓްތަކަށް ޓޫރިސްޓުން އުފުލަން ވެސް ބޭނުން ކުރާނެ ކަމަށް ޓްރާންސްޕޯޓް މިނިސްޓްރީން ބުންޏެވެ.
ހެލިކޮޕްޓަރުގެ ހިދުމަތަށް ބަޔަކު ހޯދަން ހުޅުވާލި އިރު، މިދިޔަ މަހު ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެފައި
ވަނީ ރާއްޖޭގައި އެ ހިދުމަތް ފެށުމަށް ސަލާމަތާއި ރައްކާތެރިކަން ބެލުމަށްޓަކައި އެކަމުގެ އެންމެ ތަޖުރިބާ ހުރި އިނގިރޭސިވިލާތުގެ ސިވިލް އޭވިއޭޝަން އޮތޯރިޓީ (ސީއޭއޭ) އިން ސްޓަޑީއެއް ހަދާފައިވާ ކަމަށެވެ. އެހެންވެ އެ ހިދުމަތް ރާއްޖޭގައި ފަށާނީ އެ ސްޓްޑީޒްގައި ބުނާ މިންގަނޑުތަކާ އެއްގޮތަށް ކަމަށް ވިދާޅުވެފައިބެ އެވެ.
މި އަހަރު ނިމުމުގެ ކުރިން ރާއްޖޭގައި ހެލިކޮޕްޓަރުގެ ހިދުމަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ.
ރާއްޖޭގައި މިހާރު ވެސް ދެ ހެލިކޮޕްޓަރު އޮވެ އެވެ. އެއީ އިންޑިއާ އިން ހަދިޔާކޮށްފައިވާ ދޭއްޗެކެވެ. އެ ދޭތީ މީގެ ކުރިން ގަވައިދުން މެޑިކަލް އިވެކްއޭޝަންތަކަށް ބޭނުން ކުރަމުން ގޮސްފައިވެ އެވެ.