އެމެރިކާ އިން ރާއްޖެ އަށް 8.5 މިލިއަން ޑޮލަރުގެ އިތުރު އެހިއެއް ދީފި އެވެ.
މި އެހީ ދީފައި ވަނީ ޑިވެލޮޕްމަންޓް އޮބްޖެކްޓިވް ގްރާންޓް އެގްރީމަންޓް (ޑީއޯއޭޖީ) އަށް ގެނައި 14 ވަނަ އިސްލާހުގެ ދަށުން ރާއްޖެ އާއި އެމެރިކާއާ ދެމެދު މިއަދު ސޮއިކުރުމަށް ބޭއްވި ރަސްމިޔާތުގެ ތެރޭގަ އެވެ.
ފޮރިން މިނިސްޓްރީގައި އޮތް ސޮއިކުރުމުގެ ރަސްމިއްޔާތުގައި، މިނިސްޓްރީގެ ފަރާތުން ސޮއި ކުރެއްވީ ޝެރީނާ އަބްދުލް ސަމަދެވެ. އަދި އެމެރިކާގެ ސަރުކާރުގެ ފަރާތުން ސޮއިކުރެއްވީ ޔޫއެސް އެއިޑް މިޝަންގެ ފަރާތުން ބްރިއަލް ގްރާއު އެވެ.
މިއަދު ސޮއިކުރި އެއްބަސްވުމަކީ ދައުލަތުގެ މާލިއްޔަތު ބެލެހެއްޓުމުގައި ރާއްޖޭގެ ފަންނީ ޤާބިލުކަން އިތުރުކޮށް، ރާއްޖޭގެ އިގުތިސާދު އަދި ޑިމޮކްރެޓިކް ވެރިކަން އިތުރަށް ހަރުދަނާކުރުމަށް ރާއްޖެ އާއި އެމެރިކާއާ ދެމެދު ސޮއިކުރެވުނު އެއްބަސްވުމެކެވެ.
ފާއިތުވި އަހަރުތަކުގައި އެމެރިކާ އިން ދެމުން އަންނަ އެހީތައް އިތުރުވަމުން ގޮސްފައިވާ އިރު، އެއްބަސްވުމުގެ ޖުމްލަ އަގު 45.7 މިލިއަން ޑޮލަރަށް އިތުރުކޮށްފައިވެ އެވެ.