އަބުރުކަތިލަން ކުރާ މަސައްކަތް ވާނީ ފެއިލް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ޝަހީމް "އެކްސް"ގައި މިއަދު ކުރެއްވި ޕޯސްޓެއްގައި ވިދާޅުވީ ރައީސް ޑރ. މުހައްމަދު މުއިއްޒު ޙަވާލުކުރެއްވި މަސްއޫލިއްޔަތު އަމާނާތްތެރިކަމާ އެކު އަދާކުރުންމަތީ ދެމި ހުންނާނީ ފަރުބަދައެއް ފަދައިން ކަމަށެވެ. އަދި ރައީސް މުއިއްޒު ދެވަނަ ދައުރަކަށް ގެނައުމަށް ވެސް މަސައްކަތް ކުރައްވާނެ ކަމަށް ޝަހީމް ވިދާޅުވި އެވެ.
"އަބުރުކަތިލަން ކުރާ މަސައްކަތް ފެއިލްވާނެ،" ޝަހީމް ވިދާޅުވި އެވެ.
ޝަހީމް މިހެން ވިދާޅުވެފައިވަނީ އޭނާގެ ޕީއެޗްޑީ ސެޓްފިކެޓްގެ ޞައްޙަ ކަމާމެދު ސޯޝަލް މީޑީއާގައި ބައެއް ފަރާތްތަކުން ދައްކަމުންދާ ވާހަކަތަކާއި ގުޅިގެންނެވެ.
މި ވާހަކަތަކާއި ގުޅިގެން ޝަހީމްގެ ދިފާއުގައި ދީނީ އިލްމުވެރިން ކަމަށްވާ ޑރ. މުޙައްމަދު ޢިޔާޒް ޢަބްދުއްލަޠީފް އާއި ޝެއިޚް އިލްޔާސް ޙުސައިން ވަނީ ނިކުންނަވާފަ އެވެ. އެގޮތުން ޝައިހް އިލްޔާސް ވަނީ ޝަޚުސިއްޔަތު ކިލަނބު ކުރަން ބަޔަކުމީހުން ޙަޤީޤަތާ ޚިލާފު ވާހަކަތައް ކިތަންމެ ވަރަކަށް ފެތުރިޔަސް އެކަން ކާމިޔާބު ނުވާނެ ކަމަށް ވިދާޅުވެފަ އެވެ.