އާ މެނޭޖްމެންޓް ހަވާލުވިއިރު އާރްޑީސީގެ ބަޖެޓުގައި އޮތީ ހަތަރު މިލިއަން ރުފިޔާ ކަމަށް އެ ކުންފުނީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) އަލީ ޒުހޭރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ސްޓޭޓް އެންޑް އެންޓަޕްރައިޒަސް (އެސްއޯއީ) ކޮމިޓީގައި ވާހަކަދައްކަމުން ޒުހޭރު ވިދާޅުވީ މިދިޔަ އަހަރުގެ ނޮވެމްބަރު މަހުގެ ތެރޭގައި ފިނޭންސް މިނިސްޓްރީން އާރްޑީސީ އަށް 90 މިލިއަން ރުފިޔާ ދޫކޮށްފައިވާ ކަމަށާއި ނަމަވެސް އާ މެނޭޖްމެންޓް ކުންފުންޏާއި ހަވާލުވިއިރު ބަޖެޓުގައި އޮތީ ހަތަރު މިލިއަން ރުފިޔާ ކަމަށެވެ.
"ކުންފުނީގައި ނެތް އެއްވެސް ކަހަލަ އިންވޮއިސެއް ފިނޭންސް މިނިސްޓްރީ އަށް ވެސް ކުރެވިފައެއް،" ޒުހޭރު ވިދާޅުވި އެވެ.
އާރްޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރު ވަނީ މިއީ ނިޒާމުގެ ތެރެއިން ވަކި ކުންފުނިތަކަށް ފައިސާ ދޭން ކޮށްފައި ހުރި މަސައްކަތެއް ކަމަށް ތުހުމަތު ކުރައްވާފަ އެވެ. އެ މައްސަލަ މިހާރު ފުލުހުންނާއި އޭސީސީން ތަހުގީގު ކުރަމުން އަންނަ ކަމަށްވެސް ވިދާޅުވި އެވެ.
މީގެއިތުރުން އާރްޑީސީން 2022 އަދި 2023 ވަނަ އަހަރު އެއްވެސް ލިޔެކިޔުމެއް ނެތި އެކި ފަރާތްތަކަށް 161 މިލިއަން ރުފިޔާ ދޫކޮށްފައިވާ ކަމަށްވެސް ވިދާޅުވި އެވެ. އެފައިސާ ފޮނުވާފައިވަނީ އިންޓަނެޓް ބޭންކިން މެދުވެރިކޮށް ޓްރާންސްފާކޮށްގެން ކަމަށާއި ނަމަވެސް އެކަމާއި ގުޅޭ އެއްވެސް ތަފްސީލެއް ކުންފުނީގައި ނުވަތަ އިންވޮއިސް އެއްގައި ވެސް ނެތްކަމަށް އަސްބާހު ވިދާޅުވި އެވެ. އަދި މިއީ ކޮން ޚިދުމަތަކަށް ނުވަތަ ކޮން މުދަލަކަށް ދީފައި ހުރި ފައިސާއެއް ކަމެއް އެނގެން ނެތް ކަމަށްވެސް ވިދާޅުވި އެވެ.