ބަންގްލަދޭޝްގައި އިއުލާންކޮށްފައިވާ ކާފިއު އުވާލައި، ޖަލަށްލާފައިވާ އެގައުމުގެ އިދިކޮޅު ލީޑަރު އަދި ކުރީގެ ބޮޑުވަޒީރު ހާލިދާ ޒިއާ މިނިވަން ކުރަން ނިންމައިފި އެވެ.
ބަންގްލަދޭޝްގެ ބޮޑުވަޒީރު ކަމުން ޝައިހް ހަސީނާ މިއަދު އިސްތިއުފާ ދެއްވުމަށްފަހު ވަނީ އަވަށްޓެރި އިންޑިއާ އަށް ވަޑައިގެންފަ އެވެ.
ބަންގްލަދޭޝްގެ ރައީސް މުހައްމަދު ޝަހާބުއްދީންގެ އޮފީހުން ނެރުނު ބަޔާނެއްގައި ބުނީ އަސްކަރިއްޔާގެ އިސްވެރިންނާއެކު ބޭއްވި ބައްދަލުވުމުގައި ބަންގްލަދޭޝްގެ އިދިކޮޅު ލީޑަރު، ހާލިދާ ޒިއާ ވަގުތުން މިނިވަން ކުރުމަށާއި އަދި އެގައުމުގައި ކުރަމުންދިޔަ މުޒާހަރާތަކުގައި ހައްޔަރުކޮށްފައި ތިބި އެންމެން ވެސް މިނިވަން ކުރަން ނިންމާފައިވާ ކަމަށެވެ.
އަދި މާދަމާ ހެނދުނުން ފެށިގެން ބަންގްލަދޭޝްގައި އިއުލާންކޮށްފައި ކާފިއު އުވާލައި، ސަރުކާރުގެ އިދާރާތައް އަލުން ހިންގަން ފެށުމަށް ވެސް ވަނީ ނިންމާފަ އެވެ.
ހާލިދާ ޒިއާ 17 އަހަރަށް ޖަލަށްލާން ހުކުމް ކޮށްފައިވަނީ ކޮރޮޕްޝަންގެ ކުށް ސާބިތުވުމާ ގުޅިގެންނެވެ.
ބަންގްލަދޭޝްގެ ސަރުކާރުން ކަނޑައަޅާފައިވާ ވަޒީފާގެ ކޯޓާއާ ދެކޮޅަށް ކޮލެޖް ދަރިވަރުން ކުރަމުންދިޔަ މުޒާހަރާތައް ހޫނުވެ، އެންމެފަހުން މިއަދު މުޒާހަރާގެ ބައިވެރިން ވަނީ ހަސީނާ ދިރިއުޅުއްވި ގަނޑުވަރާއި އެގައުމުގެ ގާނޫނު ހަދާ މަޖިލީހަށް ވަދެގަނެ އެ ތަންތަން ހިސޯރުކޮށްފަ އެވެ.
ބަންގްލަދޭޝްގައި 15 އަހަރު ވަންދެން ވެރިކަން ކުރަމުން އައި ހަސީނާ އިސްތިއުފާ ދެއްވުމާ ގުޅިގެން ވަގުތީ ސަރުކާރެއް އެކުލަވާލަން އެގައުމުގެ އަސްކަރިއްޔާ އިން މިހާރު އަންނަނީ މަސައްކަތް ކުރަމުންނެވެ.
މިދިޔަ މަހުން ފެށިގެން ބަންގްލަދޭޝްގައި ކުރިއަށްދާ މުޒާހަރާތަކުގައި 300 އަށް ވުރެ ގިނަ މީހުން ވަނީ މަރާލާފަ އެވެ.