ރައީސް ޑރ. މުހައްމަދު މުއިއްޒު ބޭނުންފުޅު ވަނީ ކައުންސިލްތަކުގެ ސައިޒް ކުޑަކުރަން ނޫން ކަމަށާއި ބޭނުންފުޅު ވަނީ ކައުންސިލްތައް ސައިޒްކުރަން ކަމަށް އެމްޑީޕީގެ ނައިބު ރައީސް ހިސާން ހުސައިން ވިދާޅުވެއްޖެ އެވެ.
އެމްޑީޕީން ރޭ ބޭއްވި ޕެނަލް ޑިސްކަޝަނެއްގައި ވާހަކަދައްކަމުން ހިސާން ވިދާޅުވީ މުޅި ގައުމުގައި ތިބީ 1،300 އެއްހާ ކައުންސިލަރުން ކަމަށާއި ނަމަވެސް މި ސަރުކާރުގައި އެކަނި 2،000 އަށް ވުރެ ގިނަ ސިޔާސީ މުވައްޒަފުން އެބަތިބި ކަމަށެވެ.
"އެހެންވީމާ ކައުންސިލްތަކުގެ ސައިޒު ކުޑަކުރާކަށް ނޫން މި އުޅެނީ. އަޅުގަނޑުމެން ގަބޫލުކުރާ ގޮތުގައި ރައީސް މުއިއްޒު ނިކުމެވަޑައިގެން ހުންނެވީ ކައުންސިލްތައް ސައިޒު ކުރަން،" ހިސާން ވިދާޅުވި އެވެ.
ކައުންސިލްތައް ސައިޒު ކުރުމަކީ އެމްޑީޕީން ގަބޫލުކުރާނެ ކަމެއް ނޫން ކަމަށާއި އަދި އެއީ އެމްޑީޕީން ތަންދޭނެ ކަމެއްވެސް ނޫން ކަމަށް ހިސާން ވިދާޅުވި އެވެ. އަދި މަރުކަޒީ ބާރުވެރިކަމާއި، ރަށްރަށުގެ ވެރިން ކޮންޓްރޯލް ކުރަން މާލޭގައި ހުންނަ ވެރި މީހާ ބޭނުން ކުރާ ހަތިޔާރެއް ގޮތަށް ލާމަރުކަޒީ ނިޒާމް އޮތުމަކީ ރައްޔިތުން ބާރުވެރިކުރުވޭނެ ގޮތެއް ނޫން ކަމަށް ވެސް ހިސާން ވިދާޅުވި އެވެ.
ކައުންސިލްތައް ނުކަތާހާ ބޮޑު ކަމަށާއި ކައުންސިލްތަކުގެ ސައިޒު ކުޑަކުރަންޖެހޭ ކަމަށް ރައީސް ޑރ. މުހައްމަދު މުއިއްޒު ދާދިފަހުން ވަނީ ވިދާޅުވެފަ އެވެ.