ފްރާންސްގައި މިހާރު ކުރިއަށްދާ އޮލިމްޕިކްސްގައި ޖިމްނާސްޓިކުން ފިލިޕީންސަށް ދެ ރަން މެޑަލް ހޯދައި ދިން ކާލޯސް ޔޫލޯ އަށް ބޮޑެތި އިނާމުތަކެއް ހުށަހަޅައިފި އެވެ.
ގައުމަށް ހޯދައި ދިން އެ ފަހުރުވެރި ކާމިޔާބީއަށްޓަކައި އެ އިނާމުތައް ހުށަހަޅާފައި ވަނީ ސަރުކާރުގެ އިތުރުން އަމިއްލަ ބައެއް ފަރާތްތަކުންނެވެ. އެގޮތުން ޔޫލޯ، 24، އަށް ސަރުކާރުން 10 މިލިއަން ފިލިޕީންސް ޕެސޮސް 173،300 ޑޮލަރު) ދޭން ނިންމާފައިވާ އިރު، ގާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓިވްގެ ފަރާތުން އިނާމެއްގެ ގޮތުގައި ޔޫލޯ އަށް 16 މިިލިއަން ޕެސޯސް ދޭން ވަނީ ނިންމައިފަ އެވެ.
އެތަނުގެ ރައީސް ފާޑިނަންޑް މާޓިން ވިދާޅުވީ ޔޫލޯ އަކީ "ކުޅިވަރުގެ ބަތަލެއް" ކަމަށާއި އޭނަ އަކީ މިހާރު "ގައުމީ ތަރިކައެއް" ކަމަށެވެ.
ޔޫލޯ ހޯދި ކާމިޔާބީއާ ގުޅިގެން ރިއަލް ސްޓޭޓް ކުންފުންޏަކުން ވަނީ ވެރިރަށް، މެނީލާ އިން އޭނަ އަށް ތިން ކޮޓަރީގެ ލަގްޒަރީ ކޮންޑޯއެއް ވެސް ދޭން ނިންމައިފަ އެވެ. އަދި ކުންފުންޏަކުން ވަނީ އުމުރު ދުވަހަށް ޔޫލޯ އަށް ރެމެން ނޫޑްލްސް ވެސް ދޭން ނިންމައިފަ އެވެ.
މީގެ އިތުރުން ބައެއް ކްލިނިކްތަކާއި ޔުނިވަސިޓީތަކުން ވެސް ހަދިޔާގެ އެކިއެކި އަގުބޮޑު ޕެކޭޖްތައް ޔޫލޯ އަށް ހުށަހަޅާފައިވެ އެވެ.
ޔޫލޯ އުފަން ސިޓީ ކަމަށްވާ މެނީލާ އިން އޭނަ އަށް ރަތް ދޫލައިގެ ހޫނު މަރުހަބާއެއް ކިޔަން ތައްޔާރުވަމުން އަންނަ އިރު، މުޅި ފިލިޕީންސް އިން ވެސް ވަނީ އަންނަނީ ތާރީހީ މަރުހަބާއަކަށް ތައްޔާރުވަމުންނެވެ.