ރައީސް ޑރ. މުހައްމަދު މުއިއްޒުގެ ސަރުކާރުން އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ޓާޝަރީ ފެންވަރުގެ ހޮސްޕިޓަލަށް ހަދާނެ ކަމަށް ހެލްތް މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ޚަލީލާ ސުވާލު ކުރުމަށް ލިބުނު ފުރުސަތުގައި މެންބަރު އިބްރާހިމް ނާޒިލް ވަނީ އައްޑޫގައި ގާއިމުކުރާ ޓާޝަރީ ފެންވަރުގެ ހޮސްޕިޓަލުން ހިދުމަތްދެވޭނީ ކޮންއިރަކުންތޯ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން މިނިސްޓަރު ޚަލީލް ވިދާޅުވީ، ކުރީ ސަރުކާރުން އޭއީއެޗް ޓާޝަރީ ހޮސްޕިޓަލަކަށް ހެދުމަށް ކުރެހުންތަކެއް ކުރަހާ ރައްޔިތުންނަށް ދައްކާފައިވާ ކަމަށެވެ. އެހެންނަމަވެސް ކަންބޮޑުވަނީ ދައުލަތަަށް ނުކަތާވަރުގެ އިމާރަތްތައް ބިނާކުރުމަށް ކުރެހުންތައް ކުރެހިއިރު މިކަންކުރެވޭނެ އެއްވެސް މަގެއް ފެންނަން ނެތް ކަމަށާއި ދައުލަތުގައި ފައިސާ ނެތްކަމަށެވެ. އަދި ކުރެހުންތައް ކުރަހާފައިވަނީ ދޭންޖެހޭ ހިދުމަތާ ނުބައްދަލު ގޮތެއްގައި ކަމަށްވެސް ވިދާޅުވިއެވެ.
ޚަލީލް ވިދާޅުވީ މިސަރުކާރުން ޑިޒައިން ކުރަނީ ރައްޔިތުން ބޭނުންވާ އެއްވެސް ހިދުމަތަކަށް ބުރޫނާރާ ހިދުމަތްތައް ދެވޭނެ ގޮތަށް ކަމަށެވެ.
އައްޑޫ އިކްއެޓޯރިއަލް ހޮސްޕިޓަލް ތަރައްގީ ކުރުމަކީ މިސަރުކާރުން ވަރަށް އިސްކަންދޭކަމެއްކަން ފާހަގަކޮށް މިނިސްޓަރު ޚަލީލް ވިދާޅުވީ މިސަރުކާރުން އޭއީއެޗް ޓާޝަރީ ފެންވަރަށް ތަރައްގީ ކުރާނެކަމަށެވެ. އަދި އެ އިމާރާތް ރީޑިޒައިންކޮށް ބޭނުންވާ ފަންޑީންގެ މަސައްކަތް ކުރިއަށްދާ ކަމަށްވެސް ވިދާޅުވިއެވެ. އޭއީއެޗް ތަރައްގީ ކުރުމުގެ މަސައްކަތް އަންނަ އަހަރު ކުރީކޮޅު ފެށޭނެ ކަމަށްވެސް މިނިސްޓަރު ވިދާޅުވިއެވެ.