ޗައިނާގެ ސިޗުއާން ޕްރޮވިންސްގެ ސްޓޭންޑިން ކޮމިޓީގެ ވައިސް ޗެއާމަން، ޒޫ ޗުންޝިއު ރާއްޖެ ވަޑައިގެންފިއެވެ. އެކަމަނާގެ މި
އޭނަގެ މި ދަތުރުގެ މަގުސަދަކީ ރާއްޖެ އާއި ޗައިނާއާ ދެމެދު އޮތް ވިޔަފާރި އާއި އިގުތިސާދި އިންވެސްޓްމަންޓްގެ ގުޅުން އިތުރަށް ބަދަހިކުރުމާ ގުޅޭ މަޝްވަރާތަކެއް ކުރުމެވެ. އެގޮތުން މި ދަތުރުގެ ތެރޭގައި ޒޫ، ރައްޔިތުންގެ މަޖިލީހުގެ އިސްވެރިންނާއި، ސަރުކާރުގެ އެކި މިނިސްޓަރުންނާ ބައްދަލުކުރައްވާނެ އެވެ.
އަދި މި ދަތުރުފުޅުގެ ބައެއްގެ ގޮތުން، ޗައިނާ (ސިޗުއާން) މޯލްޑިވްސް ޓްރޭޑް އެންޑް އިންވެސްޓްމަންޓް ކޮންފަރެންސެއް މި މިއަދު ބާއްވަން ހަމަޖެހިފައިވެ އެވެ. މި ކޮންފަރެންސްގައި ސިޗުއާން ޕްރޮވިންސްގެ އެކި ދާއިރާތަކުގެ ވިޔަފާރިތަކުން ބައިވެރިވެރިވާނެ އެވެ. އޭގެ ތެރޭގައި ދަނޑުވެރިކަމާއި، މޭވާ އަދި ތަރުކާރީ ސަޕްލައިކުރާ ފަރާތްތަކާއި، ކާބޯތަކެތި އުފެއްދުމާއި، ޕްރޮސެސްކުރުމާއި އެކްސްޕޯޓް އަދި ސަޕްލައިއާ ބެހޭ ވިޔަފާރިތަކާއި، ކޮންޒިއުމާ ގުޑްސް އަދި ހޯލްސޭލް ވިޔަފާރިތަކާއި، ފަތުރުވެރިކަމާ ބެހޭ ދާއިރާގެ ވިޔަފާރިތައް ހިމެނެ އެވެ.
މި ކޮންފަރެންސްގައި ބައިވެރިވާން ދިވެހި ވިޔަފާރިތަކަށް ވެސް އިކޮނޮމިކް މިނިސްޓްރީން މިދިޔަ މަހުގެ ތެރޭގައި ހުޅުވައިލި އެވެ.
މިނިސްޓްރީން ބުނެފައި ވަނީ ކޮންފަރެންސްގެ ސަބަބުން ދިވެހި ވިޔަފާރިވެރިންނަށް ޗައިނާގެ އެކި ކުންފުނިތަކާ ބައްދަލުކޮށް މުއާމަލާތް ކުރުމުގެ ފުރުޞަތު ލިބި، ވިޔަފާރިއަށް މަގުފަހިވެގެންދާނެ ކަމަށެވެ. އެވެ. އަދި މިއީ ދެ ޤައުމުގެ ވިޔަފާރީގެ ގުޅުން އިތުރަށް ވަރުގަދަކޮށް، އިޤްތިޞާދީ ގުޅުން ބަދަހިކުރުމަށް މަގުފަހިވެގެންދާނެ މުހިންމު ފިޔަވަޅެއް ކަމަށެވެ.