ލޯކަލް ޓޫރިޒަމް ފުޅާވާ ރަށްރަށުގައި ސިއްހީ ހިދުމަތް ފުޅާކުރުމަށް މަސައްކަތްތަކެއް ކުރަމުންދާކަމަށް ހެލްތް މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރު އަނާރާ ނައީމް ވަނީ ހުރާދާއިރާގައި ފަތުރުވެރިކަން ފުޅާވަމުންދާއިރު އެސަރަހައްދުގެ ސިއްހީ ހިދުމަތް އިތުރަށް ފުޅާކުރެވޭނެ ގޮތަކާ ގުޅޭގޮތުން ސުވާލުކޮށްފައެވެ. އެ ސުވާލަށް ޖަވާބު ދެއްވަމުން މިނިސްޓަރު ޚަލީލް ވިދާޅުވީ ރައްޔިތުން ހިދުމަތް ބޭނުންވެގެން އަންނަ ވަގުތުތަކުގައި ފަސޭހައިން ހިދުމަތްދެވޭނެ ގޮތެއް ބަލަމުންދާ ކަމަށެވެ.
ކ، ވ، އއ، އަދި އދ އަތޮޅުގައި ލޯކަލް ޓޫރިޒަމް އިތުރަަށް ފުޅާވަމުންދާއިރު އެ ރަށްރަށުގައި ސިއްހީ ހިދުމަތް އިތުރަށް ފުޅާކުރުމުގެ މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ. އެގޮތުން ހިދުމަތް ހޯދާ ނިސްބަތަށްބަލާ ބައެއް ރަށްރަށުގައި ލެބޯޓްރީ ގާއިމު ކުރުމުގެ މަސައްކަތް ކުރިއަށްގެންދާ ކަމަށް ވިދާޅުވިއެވެ.
މީގެއިތުރުން އީއާރްގެ ހިދުމަތް ފުޅާކުރުމަށް މަސައްކަތް ކުރަމުންދާކަމަށް ވެސް ވިދާޅުވިއެވެ.
މިސަރަހައްދުތަކަކީ މާލެއާ ކައިރި ސަރަހައްދުތަކަކަށް ވުމުން އީއާރް ފެސިލިޓީން ބަލިމީހާ ސްޓެބަލައިޒް ކުރުމަށްފަހު ރަނގަޅު ފެންވަރުގެ ހިދުމަތްދެވޭ މަރުކަޒަކަށް އެމީހާ ބަދަލުކުރެވޭނެ ނިޒާމު ހަމަޖެއްސޭނެކަން ފާހަގަ ކުރެއްވިއެވެ. އެގޮތަށް މަސައްކަތް ކުރުމަށް ބައެއް ޑިޒައިންތަކަށް ބަދަލުގެނައުމުގެ މަސައްކަތްވެސް ކުރާކަމަށް ވިދާޅުވިއެވެ.