މިދިޔަ ފަސްއަހަރު ގޮސްފައިވަނީ ސިއްހީ ނިޒާމާމެދު ވަރަށް އަޅާލުން ކުޑަކޮށް ކަމަށް ހެލްތް މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މިނިސްޓަރު ޚަލީލް ވިދާޅުވީ މިދިޔަ ފަސް އަހަރު ސިއްހީ ނިޒާމަށް ވަރަށް އަޅާލުން ކުޑަކޮށް ކަންކަން ކޮށްފައިވާ ކަމަށެވެ. އެގޮތުން ވަރަށް ގިނަ ސިއްހީ ހިދުމަތްދޭ ތަންތަނުގެ ހާލަތުވެސް ވަރަށް ބޮޑަށް ދަަށަށް ގޮސްފައިވާ ކަމަށް ވިދާޅުވިއެވެ.
"ލަކުޑި ދޮރު ހުރެއްޖިއްޔާ ހުންނަނީ ބޮއެފަ، އޭގެތެރޭގައި އެކި ވައްތަރުގެ ފަންޏާ އެއްޗެހި އުޅޭތަން އަޅުގަނޑު ލޮލުން ދުށިން."
މިނިސްޓަރު ޚަލީލް ވިދާޅުވީ، ފާހަގަކުރެވުނީ މަރާމާތެއް ނެތި ތަންތަން ވަރަށް ބޮޑަށް ދޫކޮށްލާފައި ހުރި މަންޒަރު ކަމަށެވެ. މިސަރުކާރު ވެރިކަމާ ހަވާލުވިއިރު ވަރަށް ގިނަ ހޮސްޕިޓަލްތައް އަދި ސިއްހީ މަރުކަޒުތަކަކީ ފެން ލީކުވާ ތަންތަންކަން ފާހަގަ ކުރެއްވިއެވެ.
މިސަރުކާރުން ހަވާލުވިއިރު 100 އާ ގާތްކުރާ އަދަދަށް ޑޮކްޓަރުން މަދު ކަމަށާއި އަދި ނަރުހުންވެސް މަދުކަމަށް ވިދާޅުވިއެވެ. ރައްޔިތުންނާ މިހާ ގާތުން ހިދުމަތްދޭ ތަންތަން އަޅާލުން ކުޑަކޮށް ދޫކޮށްލެވިފައި އޮތުމުން ކަންބޮޑުވާކަމަށްވެސް މިނިސްޓަރު ވިދާޅުވިއެވެ.