އިންޝުއަރެންސްގެ ވިޔަފާރި ހަރުދަނާކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި "އިންޝުއަރެންސްގެ ބިލު" ގެ ބަހުސް ފަށައިފިއެވެ.
ސަރުކާރުގެ ފަރާތުން "އިންޝުއަރެންސްގެ ބިލު" މަޖިލީހަށް ހުށަހަޅާފައިވަނީ މަހިބަދޫ ދާއިރާގެ މެންބަރު އަހުމަދު ތާރިގްއެވެ. ރައްޔިތުންގެ މަޖިލީހުގެ އިއްޔެގެ ޖަލްސާގައި މި ބިލުގެ ފުރަތަމަ ކިޔުން އިއްވާފައިވާއިރު މިއަދުގެ ޖަލްސާގައި ވަނީ ބަހުސް ކުރިއަށް ގެންގޮސްފައެވެ.
މި ބިލު ހުށަހަޅުއްވާ މަޖިލީހުގައި ވާހަކަ ދައްކަވަމުން މެންބަރު ތާރިގް ވިދާޅުވީ އިންޝުއަރެންސްގެ ވިޔަފާރިއަކީ ރާއްޖޭގައި ތަރައްގީވަމުން އަންނަ އިންޑަސްޓްރީއަކަށްވާއިރު މި އިންޑަސްޓްރީ ފުޅާކޮށް ހަރުދަނާ ގޮތެއްގައި ކުރިއަށް ގެންދެވޭނެ ގޮތަށް މި ބިލު މަޖިލީހުން ނިމިިގެންދާއިރު އޮތުން މުހިންމު ކަމަށެވެ. އަދި އިންޝުއަރެންސް އިންޑަސްޓްރީ ހަރުދަނާ ކުރެވޭނެ ގޮތަށް މެންބަރުން ހިޔާލު ހުށަހެޅުމަށްވެސް އެދިވަޑައިގަތެވެ.
ސަރުކާރުގެ ފަރާތުން މި ބިލު ހުށަހަޅާ ސަބަބެއްގެ ގޮތުގައި ބުނެފައިވަނީ، ރާއްޖޭގައި ހަރުދަނާ އަދި ރައްކާތެރި ގޮތެއްގައި އިންޝުއަރެންސް ވިޔަފާރި ހިންގުމަށްޓަކައި އަމަލުކުރަންޖެހޭ އުސޫލުތައް ކަނޑައެޅުމުގެ ގޮތުން، އިންޝުއަރެންސް ކުންފުނިތަކާއި އިންޝުއަރެންސް އިންޓަރމީޑިއަރީންގެ ގޮތުގައި ހަރަކާތްތެރިވާ ފަރާތްތަކަށް ލައިސެންސް ދިނުމާގުޅޭ އުސޫލުތައް ބަޔާން ކުރުން ކަމަށެވެ. އަދި އެ ފަރާތްތައް ރެގިއުލޭޓްކޮށް ސުޕަވައިޒްކުރުމާ ގުޅޭ އުސޫލުތަކާއި އެނޫންވެސް އިންޝުއަރެންސް ވިޔަފާރިއާގުޅޭ އުސޫލުތައް ކަނޑައެޅުމަށް ބޭނުންވާ ޤާނޫނީ އޮނިގަނޑު ގާއިމު ކުރުމެވެ.
މި ބިލުގައި ބުނެފައިވަނީ، އެއްވެސް ފަރާތަކުން އިންޝުއަރެންސް ކްލެއިމް ކުރުމުގައި ގަސްދުގައި ތެދުނޫން މައުލޫމާތެއް ދީގެން ހައްގު ނޫން މަންފާއެއް ހޯދުމަށް އުޅެފިނަމަ އަދި އެފަދަ ކަމަކަށް އެހީތެރުވެއްޖެނަމަ، ކަމުގެ ކުޑަބޮޑުމިނަށް ބަލައި 100،000 ރުފިޔާއާއި 5 މިލިއަން ރުފިޔާއާ ދެމެދުގެ އަދަދކުން ޖުރިމަނާ ކުރެވޭނެ ކަމަށެވެ.