ރާއްޖޭގައި ގައިންގަޔަށް ނާރާބަލިތައް އިތުރުވާތީ ދިރާސާއެއް ހެދުމުގެ މަސައްކަތް ކުރިއަށްދާ ކަމަށް ހެލްތް މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން މިނިސްޓަރު ޚަލީލް ވިދާޅުވީ ގައިންގަޔަށް ނާރާ ބައެއްކަހަަލަ ބޮޑެތި ބަލިތައް ރާއްޖޭއިން ގިނައިން ފެންނަމުންދާކަން ފާހަގަކުރެވޭ ކަމަށެވެ.
އެކަމާ ގުޅިގެން ދިރާސާއެއް ކުރުމަށް ދުނިޔޭގެ ސިއްހަތު ޖަމިއްޔާއާއެކު މަސައްކަތްތައް ކުރިއަށްގެންދާ ކަމަށް މިނިސްޓަރު ޚަލީލް ވިދާޅުވިއެވެ. އެކަމަށް ބޭނުންވާ ކޮންސަލްޓެންޓެއް ވަރަށް އަވަހަށް ހަމަޖެހިގެންދާނެ ކަމަށާއި އެއާއެކު ދިރާސާގެ މަސައްކަތް ފެށިގެންދާނެ ކަމަށް ވިދާޅުވިއެވެ.
ހެލްތް މިނިސްޓްރީގެ ބައެއް އަމިއްލަ ދިރާސާތައް ދައްކާގޮތުން ބައެއް ރަށްރަށުގައި ބައެއްކަހަލަ ބަލިތައް ގިނަކަން ފާހަގަކުރެވޭ ކަމަށާއި އެގޮތުން ބައެއް ރަށްރަށުގައި ކެންސަރު ބަލި އިތުރުކަން ފާހަގަ ކުރެވޭ ކަމަށެވެ.
އެހެންކަމުން އެފަދަ ބަލިތައް އިތުރުވާ ސަބަބަކީ މިހާރު ކޮންމެހެންވެސް ބަލަންޖެހޭ ކަމެއް ކަމަށް މިނިސްޓަރު ޚަލީލް ވިދާޅުވިއެވެ.