ޗައިނާގެ ބޭންކެއް ހުޅުވުމުގެ މަސައްކަތް ކުރަމުން އަންނަ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެ އެވެ.
މިއަދު ފެސި "މޯލްޑިވްސް-ސިޗުއާން ޓްރޭޑު އެންޑު އިންވެސްޓުމަންޓު ކޯރޕަރޭޝަން ކޮންފަރެންސް" ފެށުމުގެ ރަސްމިއްޔާތުގައި މިނިސްޓަރު ވިދާޅުވީ ޗައިނާއާ އެކީ މިނިވަން ވިޔަފާރީގެ އެއްބަސްވުމަށް އަންނަ މަހުގެތެރޭ އަމަލު ކުރަން ފަށަން ތައްޔާރުވަމުންދާ އިރު، އޭގެ ތެރެއިން ރާއްޖެ އަށް ގިނަ ފައިދާތަކެއް ލިބޭނެ ކަމަށެވެ.
"ވަރަށް އުފަލާއެކު ދަންނަވަން، އެއްވެސް ޤައުމަކަށް ޗައިނާގެ މިނިވަން ވިޔަފާރީގެ ޕްރޮސެސް ތެރެއިން، ނެގޭނެ އެންމެ ބޮޑު އެޑްވާންޓޭޖު ދިވެހި ރާއްޖެއަށް ނެގޭނެ،" ސައީދު ވިދާޅުވި އެވެ. "އެގޮތަށް ރައީސްގެ މުޢިއްޒުގެ މަސައްކަތްޕުޅު އަދި ތަރައްޤީގެ އަމާޒު ހިއްޕަވާ އަދި ޗައިނާގެ ލީޑާޝިޕާ ވަނީ ހިއްސާކޮށްފައި."
މިނިސްޓަރު ވިދާޅުވީ މިނިވަން ވިޔަފާރީގެ ފައިދާ ވިޔަފާރިވެރިންނަށް އެންމެ ބޮޑަށް ލިބޭނެ މަގުތައް ހޯދުމަށް ސަރުކާރުން މަސައްކަތްކުރާނެ ކަމަށާއި އޭގެ ތެރެއިން ޗައިނާގެ ބޭންކެއް ވެސް ރާއްޖޭގައި ހުޅުވިގެން ދާނެ ކަމަށެވެ. އަދި އެއީ ރައީސް ޑރ. މުހައްމަދު މުއިއްޒު ވަރަށް ބޮޑަށް ބޭނުންވެވަޑައިގަންނަވާ ކަމެއް ކަމަށެވެ. އެހެންވެ އެކަމާ ގުޅޭ މަސައްކަތްތައް ކުރިއަށްދާ ކަމަށް ވިދާޅުވި އެވެ.
"ޕީޕަލްސް ބޭންކު އޮފް ޗައިނާ އާއި އެމްއެމްއޭއާއެކު އެއްބަސްވުން ޤާއިމްކުރުމުގެ މަސައްކަތް ދަނީ ކުރެވެމުން،" ސައީދު ވިދާޅުވި އެވެ. "މިކަން މިގޮތަށް ވީމައި، ރާއްޖެއަށް ޗައިނާއިން މުދާ އެތެރެކުރާ ފަރާތްތަކުން، ދިވެހި ބޭންކެއް މެދުވެރިކޮށް ދިވެހި ރުފިޔާ އިން ފައިސާ ދެއްކޭނެ ގޮތް ފަހިވެގެން ދާނެ."