ރާއްޖޭގައި ބަންކަރިންގެ ހިދުމަތް މި މަހުގެ 22 ގައި ފަށަން ނިންމައިފި އެވެ.
ޗައިނާ އާއި ރާއްޖެއާ ދެމެދު ވިޔަފާރީގެ ގުޅުން ބަދަހި ކުރުމަށްޓަކައި މިއަދު ބޭއްވި ކޮންފަރެންސް ފެށުމުގެ ރަސްމިއްޔާތުގައި މިނސްޓަރު ވިދާޅުވީ 22 ވަނަ ދުވަހު ބަންކަރިންގެ ހިދުމަތް ފެށުމުގެ ތައްޔާރީތައްވަމުން އަންނަ ކަމަށެވެ.
އެގޮތުން އެ ދުވަހު އިހަވަންދިއްޕޮޅުގައި އެކަމަށް ހާއްސަ ރަސްމިއްޔާތެއް ވެސް އޮންނާނެ ކަމަށް މިނިސްޓަރު ވިދާޅުވި އެވެ.
"ރާއްޖެ ކަނޑެއްގެ މެދުގައި އޮންނައިރު، ރާއްޖެއަށް މެރިޓައިމް ސިނާއަތުގެ ފައިދާ ނެގުމާއި ރީ-އެކްސްޕޯޓު ފުޅާކުރުމަކީ އަޅުގަނޑުމެން ކުރަން ޖެހޭ ކަމެއް،" ސައީދު ވިދާޅުވި އެވެ. "އެގޮތަށް މަސައްކަތްކުރަމުން މި ދަނީ، ބަންކަރިން ހިދުމަތް ވެސް މިމަހުގެ 22 ވަނަ ދުވަހު ފެށިގެންދާނެ،" ވަޒީރު ވިދާޅުވިއެވެ.
އިހަވަންދިއްޕޮޅުގައި ބަންކަރިން މަޝްރޫއެއް ހިންގަން ހަކަތައިގެ ވިޔަފާރި ކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކީ އެސްޓީއޯ އިން ސޮއިކުރީ މި އަހަރުގެ މާޗް 13 ގަ އެވެ.
އެގޮތުން އެ ޚިދުމަތަށް 4،000 ޓަނުގެ ތެޔޮ އުފުލޭ ދެ އުޅަނދު ގެންނާނެ ކަމަށް އެސްޓީއޯ އިން ބުނެފައިވެ އެވެ.
މިނިސްޓަރު ސައީދު ވިދާޅުވެފައިވާ ގޮތުގައި ބަންކަރިންގެ ހިދުމަތުގެ ސަބަބުން ރާއްޖޭގެ އުތުރުގެ ސަރަހައްދުން 300-450 އާ ދެމެދުގެ އަދަދަކަށް ކޮމާޝަލް ބޯޓު ފަހަރު ދަތުރު ކުރާނެ އެވެ. އަދި މި ހިދުމަތުގެ ފުރަތަމަ އަހަރު އެކަނި ވެސް ރާއްޖެއަށް 400 މިލިއަން ޑޮލަރު ވަންނާނެ ކަމަށް ވިދާޅުވެފައިވެ އެވެ.