މިއަހަރުގެ ސެޕްޓެމްބަރު މަހު ބޭއްވުމަށް ހަމަޖެހިފައިވާ ސްރީލަންކާގެ ރިޔާސީ އިންތިހާބުގައި ނަމާލް ރާޖަޕަކްސާ ވާދަ ކުރުމަށް ނިންމައިފި އެވެ.
ލަންކާގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ސްރީލަންކާ ޕޮޑުޖަނާ ޕެރަމުނާ (އެސްއެލްޕީޕީ) ގެ ޓިކެޓުގައި ރިޔާސީ އިންތިހާބުގައި ނަމާލް ވާދަކުރާނެކަން މާދަމާ އިއުލާންކުރާނެ އެވެ. އެ ޕާޓީގެ ޓިކެޓުގައި މީގެކުރިން ވާދަކުރަން ނިންމާފައި އޮތީ މަހުޖަނު، ދަމްމިކާ ޕެރޭރާ ނަމަވެސް އޭނާ ވަނީ ނަން އަނބުރާ މިހާރު ގެންގޮސްފަ އެވެ.
އުމުރުން 38 އަހަރުގެ ނަމާލް ވެގެންދާނީ ލަންކާގެ ރިޔާސީ އިންތިހާބެއްގައި ކުރިމަތިލާ އެންމެ ހަނގު ކެންޑިޑޭޓަށެވެ. އަދި އިންތިހާބު ކާމިޔާބުވެއްޖެ ނަމަ ނަމާލް ވެގެންދާނީ އެ ޤައުމުގެ އެންމެ ހަގު ރައީސް އަށެވެ.
ލަންކާގެ ކުރީގެ ބޮޑުވަޒީރު މަހިންދަ ރާޖަޕަކްސާގެ ދަރިފުޅު ނަމާލް ވަނީ މީގެކުރިން އެގައުމުގެ ގާނޫނު ހަދާ މަޖިލީހުގެ މެމްބަރުކަން ވެސް ކުރައްވާފަ އެވެ.
ލަންކާގެ ރިޔާސީ އިންތިހާބުގައި ގިނަ އަދަދެއްގެ ކެންޑިޑޭޓުން ވާދަކުރެ އެވެ. އޭގެތެރޭގައި ލަންކާގެ މިހާރުގެ ރައީސް ރަނިލް ވިކްރަމްސިންހަ އާއި އެގައުމުގެ އިދިކޮޅު ލީޑަރު ސަޖިތު ޕްރޭމަދާސާ ހިމެނެ އެވެ.