ރައީސް ޑރ. މުހައްމަދު މުއިއްޒަށް ދިވެހި ރައްޔިތުން ދެވަނަ ދައުރެއް ދެއްވާނެ ކަމަށް ނައިބު ރައީސް ހުސެއިން މުހައްމަދު ލަތީފު ވިދާޅުވެއްޖެ އެވެ.
ޕީއެންސީގެ ހަރުގެ ޖަލްސާގައި މިރޭ ވާހަކަފުޅުދައްކަވަމުން ނައިބު ރައީސް ވިދާޅުވީ ރައީސް މުއިއްޒަކީ ރައްޔިތުންނަށް ދަތިވާ ކަންކަމުގައި އަޑުއެހުމުގެ ގާބިލުކަން ހުންނެވި ބޭފުޅެއް ކަމަށާއި ރައީސް މުއިއްޒު ކަންކަން ބާރު ސްޕީޑުގައި ތަރުތީބު ކުރައްވާނީ ރައްޔިތުން އެދޭ ގޮތަށް ކަމަށެވެ. އަދި ރައީސްގެ މެނިފެސްޓޯގައިވާ ކަންކަމަކީ މި ފަސް އަހަރުތެރޭ ހާސިލުކުރެވޭނެ ކަންކަން ކަމަށާއި އެ މަގަށް މަސައްކަތް ކުރާއިރު ދަތިތަކެއް ވެސް އެބަހުރިކަން ނައިބު ރައީސް ފާހަގަކުރެއްވި އެވެ.
"ރައީސް މުއިއްޒު އެމަނިކުފާނުގެ ޒައާމަތުގައި ދައްކާނެ. އޭރުން ރައްޔިތުން ނިކުމެ އެމަނިކުފާނު ދެވަނަ ދައުރަކަށް، ފުރަތަމަ ފަހަރަށް ރާއްޖޭގެ ރައީސަކު ހޮވާ ކަމަށްވާނަމަ މިފަހަރު ރައީސް ޑރ. މުހައްމަދު މުއިއްޒު ތިބޭފުޅުން ހޮއްވަވާނެ ކަމާމެދު ޝައްކެއް ނެތް،" ނައިބު ރައީސް ވިދާޅުވި އެވެ.
ރައީސް މުއިއްޒަށް ވަރަށް ބޮޑަށް ތައުރީފު ކުރައްވަމުން ނައިބު ރައީސް ވަނީ އެމަނިކުފާނަކީ ބަހުގައި ހިފަހައްޓައިގެން، އެ ބަސް ތަންފީޒުކުރުމަށްޓަކާ މަސައްކަތް ކުރައްވާ ވެރިއެއް ކަމަށްވެސް ވިދާޅުވެފަ އެވެ. އަދި ބުއްދީގެ ނިއުމަތް ދެއްވާފައިވީ ނަމަވެސް ކޮންމެ ފަދަ ވާހަކައެއް ދެއްކުމަކީ ރަނގަޅު ކަމެއް ނޫން ކަމަށާއި އެ މަގު އިހުތިޔާރު ކުރާ ބަޔަކަށް ނުވުމަށް ވެސް ނައިބު ރައީސް ވަނީ އިލްތިމާސްކުރައްވާފަ އެވެ.