ފަލަސްތީނުގެ މިނިވަން ކަމަށް މަސައްކަތް ކުރާ ހަމާސް ޖަމާއަތުގެ އާ ލީޑަރަކަށް ޔަހްޔާ އައްސިންވާރު ހަމަޖައްސައިފި އެވެ.
ސިންވާރު ،61، އެ މަގާމަށް ހަމަޖައްސާފައިވަނީ ހަމާސްގެ ލީޑަރު އިސްމާއިލް ހަނިއްޔާ ދާދިފަހުން އަވާހަރަކޮށްލުމާ ގުޅިގެންނެވެ. ހަނިއްޔާ އަވަހާރަކޮށްލީ އީރާންގެ އާ ރައީސް މަގާމުގެ ހުވާ ކުރެއްވުމުގެ ރަސްމިއްޔާތަށް ވަޑައިގެން އުޅުއްވަނިކޮށް އޭނާ ހުންނެވި ގެޔަށް ހަމަލާ ދީގެންނެވެ.
ހަމާސްގެ ލީޑަރު ކަމަށް ސިންވާރު ހަމަޖެއްސީ ގަތަރުގެ ވެރިރަށް ދޯހާގައި ކުރިއަށްދިޔަ މަޝްވަރާ ބައްދަލުވުންތަކަކަށްފަހު އެވެ. ސިންވާރު މިހާތަނަށް ހުންނެވީ ހަމާސްގެ ގާޒާ ގޮފީގެ ސިޔާސީ ވެރިޔާގެ މަގާމުގަ އެވެ.
ސިންވާރަކީ އިޒްރޭލުގެ "ވޯންޓެޑް ލިސްޓު"ގެ އެންމެ ކުރީގައި އޮތް ފަރާތެވެ. އިޒްރޭލުން ތުހުމަތު ކުރާ ގޮތުގައި އޮކްޓޫބަރު 7 ގައި ހަމާސް އިން އިޒްރޭލަށް ދިން ހަމަލާގެ މޭސްތިރިޔަކީ ސިންވާރެވެ. އޭނާ އަކީ އެމެރިކާގެ ޓެރަރިސްޓުންގެ ލިސްޓުގައި ވެސް ހިމެނޭ ފަރާތެކެވެ.
އިޒްރޭލުން ގާޒާ އަށް ހަމަލާތައް ދޭން ފެށި ފަހުން ސިންވާރު އާންމުންނަށް ފެނިފައެއް ނުވެ އެވެ. ސިންވާރަކީ އިޒްރޭލުގެ ޖަލުގައި ގިނަ ދުވަސްތަކެއް ހޭދަކުރެއްވި ފަރާތެކެވެ.
ހަނިއްޔާ އަވަހާރަކޮށްލުމާ ގުޅިގެން ހަމާސް އާއި އިރާނުން ވަނީ އިޒްރޭލަށް ވަރުގަދަ ހަމަލާއެއް ދޭނެ ކަމުގެ އިންޒާރު ދީފަ އެވެ.