ކުރީގެ ރައީސް އަބްދުﷲ ޔާމީންގެ އަގުވެއްޓެނީ ދައްކާ ވާހަކަ ހަނދާން ނެތޭތީ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ޕީއެންސީގެ ހަރުގެ ޖަލްސާގައި ވާހަކަފުޅުދައްކަވަމުން އަބްދުލްރަހީމް ވިދާޅުވީ ރައްޔިތުންގެ މަޖިލީހަށް ގެނެސްފައިވާ ސައިބާ ކްރައިމްގެ ބިލާއި މެދު ކަންބޮޑުވެގެން ޔާމީން އުޅުއްވާއިރު 18 ވަނަ ރައްޔިތުންގެ މަޖިލީހުގައި އެ ބޭފުޅުން ލައްވާ ގާނޫނު އަސާސީ 24 ގަޑިއިރުތެރޭ ބަދަލުކުރީ ވެސް ޔާމީން ކަމަށެވެ. ނަމަވެސް އޭރު އެކަން ވެސް އޮތީ "އޯކޭ"ވެފައި ކަމަށް އަބްދުލްރަހީމް ވިދާޅުވި އެވެ.
"އޭރު ހަމަ އޯކޭ، އެކަމަކު މިއަދަކު ކަމަކު ނުދޭ. އެހެންވީމާ ރައީސް ޔާމީންގެ އަގުވެއްޓެނީ. އިއްޔެ ދެއްކި ވާހަކަ ހަނދާން ނެތިގެން މިއަދު އެހެން ވާހަކައެއް ދައްކާތީ،" އަބްދުލްރަހީމް ވިދާޅުވި އެވެ.
ސިޔާސީ ވަރުގަދަ ލީޑަރުންނަކީ އެއް ގޮތެއްގައި ސާބިތުވެ ތިބޭ ބައެއް ކަމަށާއި ރައްޔިތުން މިހާރު ކުރިއަށް ދަނީ ފިކުރުގެ ފަހަތުން ކަމަށްވާއިރު، ޔާމީނަށް ދެން ޖެހިވަޑައިގަންނަވާނީ ކުރީގެ ދެ ރައީސުން ކަމަށްވާ މައުމޫން އަބްދުއްގައްޔޫމާއި މުހައްމަދު ނަޝީދަށް ޖެހުނު ހާލު ކަމަށްވެސް އަބްދުލްރަހީމް ވިދާޅުވި އެވެ.
ސިޔާސީ ގޮތުން ތިންވަނަ ފިކުރެއް ރާއްޖޭގައި ނުއުފެއްދޭނެ ކަމަށާއި ދުނިޔޭގެ އެހެން ތަންތަނުގައި ވެސް ކަންކަން އޮންނަނީ އެގޮތަށް ކަމަށްވާއިރު ރާއްޖޭގައި އޮތް ދެ ފިކުރުގެ ތެރެެއިން އެންމެ ގަދައީ ޕީއެންސީގެ ފިކުރު ކަމަށް އޭނާ ވިދާޅުވި އެވެ.