މަޝްހޫރު އެކްޓަރު ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް މުހިއްމު ރޯލެއް ކުޅެފައިވާ ލޯބީގެ ބިރުވެރި ފިލްމު "ސާޔާ" މިރޭ އޮލިމްޕަހުގައި ކުލަގަދަކޮށް ޕްރީމިއާކުރަން ތައްޔާރުވްޖެ އެވެ.
މި ފިލްމަކީ ޔޫއްޕެ ޕްރޮޑަކްޝަނާއި ޕްރޮޑިއުސަރު އިސްމާއީލް ޝަފީގުގެ ޝައި ޕްރޮޑަކްޝަން ގުޅިގެން ގެނެސްދޭ ފިލްމެކެވެ.
ގިނަ ބަޔަކު އިންތިޒާރު ކުރަމުން އަންނަ "ސާޔާ" އަކީ ފަޅުރަށަކަށް ހަނީމޫނަށްދާ ދެމަފިރިއަކަށް ކުރިމަތިލާން ޖެހޭ ބިރުވެރި ހާދިސާތަކެއް ދައްކުވައި ދޭނެ ފިލްމެކެވެ. މީގެ ދެ ޓްރެއިލާއެއް ވެސް އާންމުކޮށްފައިވާ އިރު، މިއީ ބިރުވެރި ލޯބީގެ ފިލްމުތަކަށް ލޯބިކުރާ މީހުން ބޭނުންވާނެ ގިނަ ރަހަތަކެއް އެކުލެވޭނެ ފިލްމެއްކަން ޓްރެއިލާތަކުން ދައްކުވައި ދެ އެވެ.
"ސާޔާ" ގެ ލީޑްގައި ހިމެނެނީ ޔޫއްޕެ އާއި އައިމިނަތު ރަޝްފާ (އާޝާ) ގެ އިތުރުން އިބްރާހީމް ޖިހާދު (ޖިމީ) އެވެ. އިތުރު ކާސްޓުންގެ ތެރޭގައި އަހުމަދު ނިމާލު އަދި މުހައްމަދު މަނިކު ފަދަ ފަންނާނުން ވެސް ހިމެނެ އެވެ.
ޔޫއްޕެ މިދިޔަ އަހަރު ވެސް ބެލުންތެރިންނަށް މަގުބޫލު ބިރުވެރި ފިލްމެއް ގެނެސްދިނެވެ. އެއީ"ކަޅަކި" އެވެ. ޔޫއްޕެ ހަދާފައިވާ ބިރުވެރި ފިލްމުތަކުގެ ތެރޭގައި "ދައުވަތު" އާއި "އެ ދަތުރު" ވެސް ހިމެނެ އެވެ.
"ސާޔާ" އަކީ އޮލިމްޕަހުގައި މި އަހަރު އަޅުވާ 6 ވަނަ ފިލްމެވެ. އެންމެ ފަހުން އެޅުވި އެ ފިލްމަކީ އިޓާނަލް ޕިކްޗާސްގެ "ލަސްވިޔަސް" އެވެ.