ޤާނޫނުއަސާސީން ރައްޔިތުންގެ މަޖިލީހަށް މަތިކޮށްފައިވާ ޒިންމާތައް އަދާކުރާނެ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަބްދުއްރަހީމް ވިދާޅުވީ މިއަދަކީ ޤާނޫނުއަސާސީ ތަސްދީގުކުރިތާ 16 އަހަރު ފުރޭ ދުވަސް ކަމަށެވެ.
2004 ވަނަ އަހަރުން ފެށިގެން ޤާނޫނުއަސާސީ އެކުލަވާލުމުގެ މަސައްކަތް ރައްޔިތުންގެ ޚާއްސަ މަޖިލީހުން ކުރަމުންދިޔަކަން ފާހަގަ ކުރައްވާ މަޖިލިސް ރައީސް އަބްދުއްރަހީމް ވިދާޅުވީ އެ މަސައްކަތް ނިމުމުން ޤާނޫނުއަސާސީ ތަސްދީގު ކުރައްވާފައިވަނީ އޮގަސްޓް 7 2008 ގައި ކަމަށެވެ. އަބްދުއްރަހީމް ވަނީ އެ މަސައްކަތުގައި އުޅުއްވި ހާއްސަ މަޖިލީހުގެ މެންބަރުންނަށް އަދި ރިޔާސަތު ބެލެހެއްޓެވި މެންބަރު ޤާސިމް އިބްރާހިމްއަށް ޝުކުރު އަދާކުރައްވާފައެވެ.
އަބްދުއްރަހީމް ވިދާޅުވީ ޤާނޫނުއަސާސީން ރައްޔިތުންގެ މަޖިލީހަށް މަތިކޮށްފައިވާ މަސްއޫލިޔަތު އަދާކުރުމުގައި ދެމިތިބޭނެ ކަމަށެވެ.
'ޤާނޫނުއަސާސީން އަޅުގަނޑުމެނަށް ލިބިދީފައިވާ ހައްޤުތައް ކަށަވަރު ކޮށްދިނުމުގައި އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް މުއައްސަސާތައް ޖަވާބުދާރީ ކުރުވައި، ރައްޔިތުންގެ މަޖިލީހުގެ މަސްއޫލިޔަތު މިމަޖިލީހުން އަދާކުރާނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް އަޅުގަނޑު އަރުވަން." އަބްދުއްރަހީމް ވިދާޅުވިއެވެ.
ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ސަތާރަ އަހަރުން އިސްލާހުކޮށް އަމަލުކުރަންފެށި ނޫޤާނޫނުއަސާސީ އަލުން އިސްލާހު ކުރުމަށް އެމަނިކުފާނު ނިންމެވީ، އޭރުގެ ސިޔާސީ ހަލަބޮލި ކަމާއި އެކު ކުރިމަތިވި އެކިއެކި ފިއްތުންތަކުގެ ސަބަބުން، އެމަނިކުފާނު ފެއްޓެވި އިސްލާހީ އެޖެންޑާގެ ދަށުން 2004 ވަނަ އަހަރުއެވެ.