ކުޅޭނެ ފިލްމުތައް މިހާރު ހޮވަނީ ވަރަށް ބަލާފައި ކޮންމެ ކޮންމެ ބަޔަކާ އެކީ މަސައްކަތް ކުރަން ބޭނުން ނުވާ ކަމަށް އިންޑިއާގެ މަޝްހޫރު ބަތަލާ ކާޖޮލް ބުނެފި އެވެ.
ކާމިޔާބު އެތައް ފިލްމެއް ކުޅެފައިވާ 50 އަހަރުގެ ބަތަލާ ވެރައިޓީ އަށް ދިން އިންޓަވިއުއެއްގައި ބުނީ މިހާރު ސްކްރިޕްޓް ހޮވަނީ ފަރުވާތެރިކަމާއި ވިސްނުންތެރިކަމާ އެކީގައި ކަމަށެވެ. މިހާރު ޕްރޮޖެކްޓްތަކާ ހަވާލުވެއް ވެސް މަދުކޮށްފައިވާތީ ލިބޭ ކޮންމެ ކޮންމެ ފުރުސަތެއްގެ ބޭނުން ހިފަން ބޭނުން ނުވާ ކަމަށް ވެސް މަޝްހޫރު އެކްޓަރު އަޖޭ ދޭވްގަންގެ އަންހެނުން ބުންޏެވެ.
"އެންމެ މުހިއްމު ކަމަކީ އަހަންނާ އެކީ މަސައްކަތް ކުރެވޭ ފެންވަރުގެ ބަޔަކާ އެކީ މަސައްކަތް ކުރުން. އަހަރެން ބޭނުން ވަނީ ވެސް އަހަންނާ އެކީ މަސައްކަތް ކުރަން ފަސޭހަ މީހުންނާ އެކީ މަސައްކަތް ކުރަން." ކާޖޮލް ބުންޏެވެ.
އޭނަ ބުނީ އަލަށް ޕްރޮޖެކްޓްތަކާ ހަވާލުވުމުގައި މިހާރު އެންމެ ބޮޑަށް އިސްކަމެއް ދޭ ކަމަކީ ކުރިން ކުޅެފައިވާ ކަހަލަ ކެރެކްޓާތައް ރިޕީޓް ނުކުރުން ކަމަށެވެ. އެހެންވެ މިހާރު ތަފާތު އެކި ޖޯންރާތަކުގައި މަސައްކަތްކުރަން ބޭނުންވާ ކަމަށެވެ.
ކާޖޮލްގެ ކުރިއަށް އޮތް ހަތަރު ޕްރޮޖެކްޓްތަކަށް ވެސް ބަލާ އިރު، ހުރީ އޭނަ ކުރިން ތަޖުރިބާކޮށްފައި ނުވާ ކަހަލަ ޖޯންރާތަކުގެ އެއްޗިއްސެވެ. އޭގެ ތެރޭގައި މިސްޓްރީ ތުރިލާ، ހޮރޯ/ސައިކޮލޮޖިކަލް ތުރިލާ އަދި އެކްޝަން ޖޯންރާ ހިމެނެ އެވެ. ކާޖޮލްގެ ކުރިއަށް އޮތް ހަތަރު ފިލްމަކީ "ދޯ ޕައްތީ" އާއި "މަހާރާގްނީ" އާއި "މާ" ގެ އިތުރުން "ސަރުޒަމީން" އެވެ.
އޭނަގެ އެންމެ ފަހުގެ ފިލްމަކީ މިދިޔަ އަހަރުގެ އެންތޮލޮޖީ "ލަސްޓް ސްޓޯރީސް 2" އެވެ.