އެމެރިކާގެ ސިޔާސީ ދާއިރާގައި މަސައްކަތްކުރާ ބަޔަކު މަރައިލަން ރާވަމުން ދިޔަ ޕާކިސްތާންގެ މީހަކު ހައްޔަރުކޮށްފައިވާ ކަމަށް އެފްބީއައި އިން ބުނެފި އެވެ.
އެތަނުގެ ޑިރެކްޓަރު ކްރިސްޓޯފާ ވްރޭ އިއްޔެ ވިދާޅުވީ އިރާނާ ގުޅުން އޮތް އެ މީހާ އަކީ ޕާކިސްތާނަށް ނިސްބަތްވާ އާސިފް މާޗަންޓް، 46، ކަމަށެވެ. އޭނަ އަތުލައިގަތީ މިދިޔަ މަހުގެ ތެރޭގައި ނިއު ޔޯކުން ކަމަށް ވެސް އެފްބީއައި އިން ބުންޏެވެ.
އެތަނުން ބުނީ ސިޔާސީ އެކިއެކި ބޭފުޅުންނަށް ފާރަލައި އަދި ސިޔާސީ އެކިއެކި ރެލީތަކަށް ވެސް އަމާޒުކޮށް ހަމަލާތަކެއް، ދީ ސީޔާސީ ބަޔަކު މަރައިލަން ރާވަމުން ދިޔަ އިރު، އޭގެ ތެރޭގައި ރިޕަބްލިކަން ޕާޓީގެ ރިޔާސީ ކެންޑިޑޭޓް، ކުރީގެ ރައީސް ޑޮނަލްޑް ޓްރަމްޕް ވެސް ހިމެނޭ ކަމަށެވެ.
މިދިޔަ މަހުގެ ތެރޭގައި ވެސް ސިޔާސީ ރެލީއެއްގެ ތެރޭގައި ޓްރަމްޕް އަވަހަރާކޮށްލަން ހަމަލާއެއް ދީފައިވެ އެވެ. އެ ހަމަލާއިން އޭނަ ސަލާމަތްވެފައިވާ އިރު، ހަމަލާދިން ތޯމަސް މެތިއު ކްރޫކްސް ވަނީ ސީކްރެޓް ސާވިސްގެ ހަމަލާއެއްގައި މަރުވެފަ އެވެ.
އެފްބީއައި އިން ބުނީ އާސިފް އަތުލައިގަގތް އިރު، މި މަހާއި އަންނަ މަހުގެ ތެރޭގައި ސިޔާސީ މީހުންނަަށް އަމާޒުކޮށް ގިނަ ހަމަލާތަކެއް ދޭން ރާވާފައިވާ ކަމަށެވެ. އެ އިދާރާ އިން ބުނެފައި ވަނީ އިރާންގެ ދުވަސްތަކެއް ވަންދެން އުޅުމަށް ފަހު، އާސިފް އެމެރިކާ އަށް ދިޔައީ މި އަހަރުގެ އެޕްރީލް މަހުގެ ތެރޭގައި ކަމަށެވެ.
އެމެރިކާ އިން އަންނަނީ ނޮވެމްބަރުގައި ރިޔާސީ އިންތިހާބު ބާއްވަން ތައްޔާރުވަމުންނެވެ. އެގޮތުން ރިޕަބްލިކަން ޕާޓީ އާއި ޑިމޮކްރެޓިކުން މިހާރު އަންނަނީ އިންތިހާބަށް ފޯރީގައި ކެމްޕޭން ކުރަމުންނެވެ. ޑިމޮކްރެޓިކް ޕާޓީގެ ކެންޑިޑޭޓަކީ މިހާރުގެ ނައިބު ރައީސް ކަމާލާ ހެރިސް އެވެ.