ސަރުކާރުން ހުށަހަޅާފައިވާ އިންޝުއަރެންސްގެ ބިލުގައި ހިމަނާފައިވާ ޖޫރިމަނާތައް ބޮޑުކަމަށް ޕީއެންސީއަށް ނިސްބަތްވާ މަތިވެރި ދާއިރާގެ މެންބަރު ހަސަން ޒަރީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައިވަނީ އިންޝުއަރެންސްގެ ބިލުގެ ބަހުސް ކުރިއަށް ގެންގޮސްފައެވެ. ސަރުކާރުގެ ފަރާތުން މި ބިލު މަޖިލީހަށް ހުށަހަޅާފައިވަނީ މަހިބަދޫ ދާއިރާގެ މެންބަރު އަހުމަދު ތާރިގްއެވެ. މިބަހުސްގައި ވާހަކަ ދައްކަވަމުން މެންބަރު ޒަރީރު ވަނީ މިފަދަ ބިލެއް އެކުލަވާލާއިރު ވީހާވެސް ގިނަ ކުންފުނިތަކުން މި ދާއިރާގެ ތެރެއަށް ވެއްދޭނެ ގޮތެއް ހެދުމަށް ވިސްނަންޖެހޭކަން ފާހަގަ ކުރައްވާފައެވެ.
މެންބަރު ޒަރީރު ވަނީ މިހާރު ސަރުކާރުން ހުށަހަޅާފައިވާ ބިލަށް ކޮންމެވެސް ވަރެއްގެ އިސްލާހުތަކެއް އަންނަންޖެހޭކަން ފާހަގަކުރެއްވިއެވެ. އަދި ވިދާޅުވީ ބިލުގައި މިހާރު ޖުރިމަނާގެ ގޮތުގައި ކަނޑައަޅާފައިވާ އަދަދުތައް ތަންކޮޅެއް ބޮޑުކަމަަށެވެ.
މި ބިލުގައި ބުނެފައިވަނީ، އެއްވެސް ފަރާތަކުން އިންޝުއަރެންސް ކްލެއިމް ކުރުމުގައި ގަސްދުގައި ތެދުނޫން މައުލޫމާތެއް ދީގެން ހައްގު ނޫން މަންފާއެއް ހޯދުމަށް އުޅެފިނަމަ އަދި އެފަދަ ކަމަކަށް އެހީތެރިވެއްޖެނަމަ ކަމުގެ ކުޑަބޮޑުމިނަށް ބަލައި 100،000 ރުފިޔާއާއި 5 މިލިއަން ރުފިޔާއާ ދެމެދުގެ އަދަދަކުން ޖުރިމަނާ ކުރެވޭނެ ކަމަށެވެ. މީގެއިތުރުން މި ގާނޫނުގެ ދަށުން އަދަބު ކަނޑައަޅާފައިނުވާ ކަމަކަށް، އެކަމުގެ ކުޑަބޮޑު މިނަށް ބަލައި ފަސްހާސް ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެ ކަމަށްވެސް ބަޔާންކޮށްފައިވެއެވެ.
ސަރުކާރުގެ ފަރާތުން މި ބިލު ހުށަހަޅާ ސަބަބެއްގެ ގޮތުގައި ބުނެފައިވަނީ، ރާއްޖޭގައި ހަރުދަނާ އަދި ރައްކާތެރި ގޮތެއްގައި އިންޝުއަރެންސް ވިޔަފާރި ހިންގުމަށްޓަކައި އަމަލުކުރަންޖެހޭ އުސޫލުތައް ކަނޑައެޅުމުގެ ގޮތުން، އިންޝުއަރެންސް ކުންފުނިތަކާއި އިންޝުއަރެންސް އިންޓަރމީޑިއަރީންގެ ގޮތުގައި ހަރަކާތްތެރިވާ ފަރާތްތަކަށް ލައިސެންސް ދިނުމާގުޅޭ އުސޫލުތައް ބަޔާން ކުރުން ކަމަށެވެ. އަދި އެ ފަރާތްތައް ރެގިއުލޭޓްކޮށް ސުޕަވައިޒްކުރުމާ ގުޅޭ އުސޫލުތަކާއި އެނޫންވެސް އިންޝުއަރެންސް ވިޔަފާރިއާގުޅޭ އުސޫލުތައް ކަނޑައެޅުމަށް ބޭނުންވާ ޤާނޫނީ އޮނިގަނޑު ގާއިމު ކުރުމެވެ.