މި އަހަރުގެ މާޗް މަހުގެ ތެރޭގައި ބޮލީވުޑްގެ ތަރި ސިދާތު މަލްއުތުރާ ސޮއިކުރި އާ އެކްޝަން ފިލްމު "މިއްޓީ" ގެ ޝޫޓިން ފަށައިފި އެވެ.
ފިލްމީ ޚަބަރުތައް ގެނެސްދޭ މީޑީއާތަކުން ބުނީ ބަލްވިންދަރު ސިންގް ޖަނޫޖާގެ ޑައިރެކްޓްކުރާ ފިލްމުގެ ޝޫޓިން ކުރިއަށް ދަނީ އުތުރާކަންދުގައި ކަމަށެވެ. "މިއްޓީ" އަކީ ހިތްދަތި މާޒީއެއް އޮންނަ މީހަކު އަމިއްލަ ވަޒަނުގެ ދިފާއުގައި ކުރާ މަސައްކަތްތަކެއް ދައްކުވައި ދޭނެ ފިލްމެކެވެ.
ނަމަވެސް މި ފިލްމުގެ ބަތަލާ އަކީ ކާކު ކަމެއް އަދި ނޭނގެ އެވެ.
ބަތަލާ ކިއާރާ އަދުވާނީގެ ފިރިމީހާ ސިދާތުގެ އެންމެ ފަހުގެ ފިލްމަކީ މި އަހަރުގެ މާޗްގައި ރިލީޒްކުރި އެކްޝަން ތުރިލާ "ޔޯދާ" އެވެ. "މިއްޓީ" ފިޔަވައި މި ވަގުތު ސިދާތުގެ އަތުގައި އިތުރު ޕްރޮޖެކްޓެއް ނެތެވެ.
އޭނަ މި އަހަރު ވެބް ސީރީޒަކުން ވެސް ފެނިފައިވެ އެވެ. އެއީ ޖެނުއަރީގައި ޑައިރެކްޓަރު ރޯހިތު ޝެޓީ، އެމެޒޯން ޕްރައިމް ވީޑިއޯ އަށް ގެނައި "އިންޑިއަން ޕޮލިސް ފޯސް" އެވެ.