އަހަރަކު ދެ ފަހަރު ކައުންސިލްތަކުގެ ބައި-އިލެކްޝަންތައް ބާއްވަންޖެހޭގޮތަށް ޤާނޫނުތަކަށް ހުށަހެޅި އިސްލާހުތައް ރައްޔިތުންގެ މަޖިލީހުން ފާސްކޮށްފިއެވެ.
މިގޮތަށް ސަރުކާރުގެ ފަރާތުން އިސްލާހު ހުށަހަޅާފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށާއި ލޯކަލް ކައުންސިލްތަކުގެ އިންތިޚާބުގެ ޤާނޫނަށެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުގެ ފަރާތުން އިސްދޫ ދާއިރާގެ މެންބަރު އިސްމާޢީލް ޝަފީއުއެވެ. މި އިސްލާހު މަޖިލީހުން ފާސްކޮށްފައިވަނީ ވޯޓުގައި ބައިވެރިވި މެންބަރުންގެ ތެރެއިން 67 މެންބަރުންގެ ވޯޓުންނެވެ. މި އިސްލާހާ ދެކޮޅަށް ވޯޓު ދެއްވާފައިވަނީ 7 މެންބަރުންނެވެ. މީގެއުތުރުން ލޯކަލް ކައުންސިލްތަކުގެ އިންތިޚާބުގެ ޤާނޫނަށް ސަރުކާރުގެ ފަރާތުން ކާށިދޫ ދާއިރާގެ މެންބަރު މުންތަޡިމް އިބްރާހީމްއެވެ. މި އިސްލާހު ފާސްކޮށްފައިވަނީ ވޯޓުގައި ބައިވެރިވި 67 މެންބަރުންގެ ވޯޓުންނެވެ. މި އިސްލާހާ ދެކޮޅަށް 8 މެންބަރުން ވޯޓު ދެއްވިއެވެ.
ލޯކަލް ކައުންސިލްތަކުގެ އިންތިހާބުގެ ޤާނޫނަށް ގެންނަ މައިގަނޑު އިސްލާހުތަކުގެ ތެރޭގައި، ލޯކަލް ކައުންސިލްތަކުގެ ހުސްވާ ގޮނޑިއަށް މެންބަރުން އިންތިހާބުކުރަން ބާއްވާ ބައިއިލެކްޝަންތައް ބާއްވަންވާނީ އަހަރަކު ދެފަހަރު ކަމުގައެވެ. އަދި އެފަދައިން އަހަރަކު ދެފަހަރު ބައިއިލެކްޝަން ބާއްވާއިރު، ދެ ބައިއިލެކްޝަންގެ ދެމެދުގައި 183 ދުވަހަށްވުރެ ދިގު އަދި 120 ދުވަހަށްވުރެ ކުރު މުއްދަތެއް ފާއިތުވެގެންނުވާނެ ކަމުގައި ކަނޑައެޅުމަށްވެސް ހިމަނާފައިވެއެވެ.
ލާމަރުކަޒީ ގާނޫނަށް އިސްލާހު ހުށަހެޅި ސަބަބުގެ ގޮތުގައި ބުނެފައިވަނީ، ކައުންސިލްތަކުގެ ދައުރުގެ ތެރޭގައި މެންބަރުންގެ ގޮނޑި ހުސްވާ ހާލަތްތައް އިތުރުވާތީ، ތަކުރާރުކޮށް ބައިއިލެކްޝަންތައް ބާއްވަންޖެހޭތީ އެކަމަށް ކުރަންޖެހޭ ހަރަދުތައް އިތުރުވަމުންދާތީ ކަމަށެވެ. އެހެންކަމުން ބައިއިލެކްޝަންތައް ގިނަގިނައިން ބާއްވަންނުޖެހޭ ގޮތަށް ހަމަޖައްސައި، ކައުންސިލެއްގެ ގޮނޑި ހުސްވިކަން އަންގާތާ ގިނަވެގެން 183 ދުވަހުގެ މުއްދަތެއްގެ ތެރޭގައި ބައިއިލެކްޝަންތައް ބާއްވާގޮތަށް އިސްލާހު ހުށަހަޅާފައިވެއެވެ. އެހެންނަމަވެސް ކައުންސިލްގެ ނުވަތަ ކޮމިޓީގެ ޤާނޫނީ އަދަދު ހަމަވާ މިންވަރަށް މެންބަރުން ނެތް ހާލަތެއްގައި 60 ދުވަހުގެ ތެރޭގައި ބައިއިލެކްޝަން ބައްވަންޖެހޭނެކަމަށްވެސް އިސްލާހުގައި ބުނެފައިވެއެވެ.