ލިޓަސް ސާވިސް ސެންޓަރު ތެރޭގައި ވަޅިން ހަމަލާދީ ރ. މީދޫ، ފެންފިޔާޒުގޭ މުހައްމަދު އަނަސް މަރާލި މައްސަލާގައި ދައުވާ އުފުލި އެންމެން ސަލާމަތްވި މައްސަލައިގެ އިސްތިއުނާފު އަޑުއެހުންތައް ފަށައިފިއެވެ.
އަނަސް މަރާލި މައްސަލައިގައި ދައުވާކުރި މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކޮށްފައިވަނީ ފެބްރުއަރީ 25 ވަނަ ދުވަހުއެވެ. އެމައްސަލަ ދައުލަތުން ހައިކޯޓުގައި އިސްތިއުނާފު ކުރީ މޭ 16 ވަނަ ދުވަހުއެވެ.
މި މައްސަލައިގެ އަޑުއެހުން މިއަދު ހައިކޯޓުގައި ފަށާފައިވާއިރު، ދައުވާ ލިބޭ ބައެއް މީހުން ވަކީލުން ހަމަނުޖައްސާ ތިބުމުން އެމީހުންނަށް ވަކީލުން ހަމަޖެއްސުމަށް ވަނީ ހަފްތާއެއްގެ މުއްދަތެއް ދީފައެވެ. ދައުލަތުން މައްސަލަ އިސްތިއުނާފު ކުރިއިރު ވަނީ ދައުވާ ލިބޭ މީހުން ބަންދު ކުރުމުގެ އަމުރެއް ނެރުމަށްވެސް އެދިފައެވެ. އެހެންނަމަވެސް ބައެއް މީހުންގެ ވަކީލުން ނެތުމުން ދެން އަންނަ އަޑުއެހުމެއްގައި އެކަމާމެދު ގޮތެއް ނިންމަވާނެކަމަށް މައްސަލަ ބައްލަވާ ގާޒީ ފާހަގަ ކުރެއްވިއެވެ.
ހައިކޯޓުގައި މި މައްސަލަ ބައްލަވަނީ ފަނޑިޔާރު މުހައްމަދު ޝަނީޒް އަބްދުﷲ, ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ފައިސަލްއެެވެ.
އަނަސް މަރާލި މައްސަލައިގައި ދައުލަތުން ދައުވާކޮށްފައި ވަނީ ލ. ގަން، ތުނޑި، ނަންނާރިގެ ޖުނައިދު އަބްދުﷲ އާއި ސ. ފޭދޫ ވެސްޓަންވިލާ ހަސަން މަހްފޫޒް އާއި ދަފްތަރު ނަމްބަރު 1746 ސިމާހު މޫސާ އާއި ޅ. ކުރެންދޫ އަސުރުމާގެ އަހުމަދު ޒަޔާނާއި މ. ދިމިޝްގު، އުޘްމާން ޝަރީފާއި މ. ލޮނުމިދިލިގެ އަފްރާހު އަބްދުއްރައްޒާޤު އަދި ތ. ކިނބިދޫ ގުލްފާމްގެ މުހައްމަދު ޝާޒްގެ މައްޗަށެވެ.