ފަންސަވީސް އަހަރަށް ފަޅުރަށް ކުއްޔަށް ހިފަން ހުޅުވާލި ފުރުސަތުގައި މިހާތަނަށް 4 ކައުންސިލަކުން ހުށައަޅާފައިވާ ކަމަށް އިދާރީ ދާއިރާތަކާ ބެހޭ މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
މާލެ ސިޓީ ކައުންސިލަށް އަލަށް ހޮވުނު މެމްބަރުން ހުވާކުރުމަށް މިއަދު ބޭއްވި ރަސްމިއްޔާތުގައި މިނިސްޓަރު ވިދާޅުވީ ފަޅުރަށްތައް ހޯދަން ޕްރޮޕޯސަލް ހުށަހެޅި ކައުންސިލްތަކަކީ ރ. އިގުރައިދޫ ކައުންސިލާއި ދ. ކުޑަހުވަދޫ ކައުންސިލާއި މ. އަތޮޅު ކައުންސިލްގެ އުތުރުން ލ. މާވަށު ކައުންސިލް ކަމަށެވެ.
މިނިސްޓަރު ވިދާޅުވީ އެ ކައުންސިލްތަކުން ހުށަހެޅި ޕްރޮޕޯސަލްތައް ދިރާސާކޮށް ޓެކްނިކަލް މަސައްކަތްތައް ނިންމާފައި ވަރަށް އަވަހަށް ރައީސް އޮފީހަށް ފޮނުވާނެ ކަމަށެވެ.
ރަށްތައް ހޯދަން ހުށަހެޅި ކައުންސިލްތަކަށް ވޯކްޝޮޕެއް ވެސް މިނިސްޓްރީން ވަނީ ހިންގައިފަ އެވެ.
ފަޅު ރަށްތައް ދޫކުރުމުގެ ގަވާއިދުގައިވާ މިހާރު އޮތް ގޮތުން ރަށްތައް ލިބެނީ 10 އަހަރުގެ މުއްދަތަކަށް ނަމަވެސް، ގަވާއިދު ބުނާ ގޮތުން، ރަށްތަށް 21 އަހަރުގެ މުއްދަތަކަށް ދޫކުރެވިދާނެ އެވެ.
ކައުންސިލްތައް މާލީ ގޮތުން ބާރުވެރިކަން ފުރުސަތު ފަހިކޮށް ދިނުމުގެ ގޮތުން ފަޅުރަށްތައް ދޫކުރުމަށް 12 އަތޮޅަކުން 28 ރަށް ކަނޑައަޅާފައިވެ އެވެ.