ނޭޕާލްގައި މިއަދު ހެލިކޮޕްޓަރެއް ވެއްޓި ފަސް މީހަކު މަރުވެއްޖެ އެވެ.
މީޑިއާތަކުން ބުނީ އެ ގައުމުގެ ނުވަކޯޓް ސަރަހައްދަށް ވެއްޓުނީ އެއާ ޑައިނާސްޓީ ކިޔާ ކުންފުންޏެއްގެ ހެލިކޮޕްޓަރެއް ކަމަށާއި އެ ވެއްޓުނީ ތުރިބުވާން އިންޓަނޭޝަނަލް އެއާޕޯޓުން ފުރިތާ ތިން މިނިޓެއްހާ ފަހުން ގުޅުން ވެސް ކެނޑިފައި ވަނިކޮށެވެ.
ފަސް މީހުން ދަތުރުކުރި ހެލިކޮޕްޓަރުގައި ތިބި މީހުންގެ ތެރެއިން ހަތަރު މީހުންނަކީ ޗައިނާގެ ޓޫރިސްޓުންތަކެއް ކަމަށް މީޑިއާތަކުން ބުނެފައިވެ އެވެ. އޭގެ ތެރޭގައި އަންހެނަކު ވެސް ހިމެނެ އެވެ.
ނޭޕާލްގައި މިދިޔަ މަހުގެ 24 ވަނަ ދުވަހު މަތިންދާބޯޓެއް ވެސް ވެއްޓި 18 މީހަކު މަރުވެފައިވެ އެވެ.
އެ ގައުމުގައި މިފަދަ ހާދިސާތައް ހިނގުމަކީ ވަރަށް އާންމު ކަމެކެވެ.