ހިތްދަތި ގޮތަކަށް ވަކިވެ ދިޔަ ހިންދީ ސިނަމާގެ ކުރީގެ މަޝްހޫރު ބަތަލާ ޕަރްވީން ބާބީގެ ބައޮގްރަފިކަލް ޑްރާމާއެއް ހަދަން ތައްޔާރުވަމިން އަންނަ ކަމަށާއި އެ ފިލްމު ޒުވާން ބަތަލާ ޓްރިޕްތީ ދިމްރީ އަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.
ފިލްމުފެއާ އިން މިއަދު ބުނީ ޕަރްވީންގެ ބައޯޕިކް ހަދަން ނިންމާފައި ވަނީ ލިޔުންތެރިޔާ ކަރިޝްމާ އުޕަދޭ 2020 ގައި ގެނެސްދިން ބައޮގްރަފީ "ޕަރްވީން ބާބީ: އަ ލައިފް" އަށް ބިނާކޮށް ކަމަށެވެ. އެކަމަކު މި ފޮތަށް ބިނާކޮށް ފިލްމު ހަދަން އުޅޭ ޕްރޮޑަކްޝަން ހައުސްއަކީ ކޮބައިކަމާއި މި ޕްރޮޖެކްޓާ ބެހޭ އިތުރު އެއްވެސް ތަފުސީލެއް ހާމަކޮށްފައެއް ނުވެ އެވެ.
ފިލްމުފެއާ އިން ބުނީ ޕަރްވީންގެ ރޯލު ކުޅެން ޓްރިޕްތީ އަށް ހުށަހަޅައި އެކަމުގެ މަޝްވަރާތައް މިހާރު ކުރިއަށްދާ ކަމަށެވެ. އޭނަ އަކީ މިހާރު ބޮލީވުޑްގައި ވަރަށް ބާރަށް ކުރިއަރަމުން އަންނަ ބަތަލާއެކެވެ. މިދިޔަ އަހަރު ރިލިޒްކުރި "އެނިމަލް" ގައި ކުޅުނު ބޯލްޑް ކެރެކްޓާގެ ސަބަބުން ޓްރިޕްތީގެ މަޝްހޫރުކަން އިތުރުވެ، އޮފާތައް އަންނަނީ އޮހެމުންނެވެ.
އޭނަގެ އެންމެ ފަހުގެ ފިލްމަކީ މިދިޔަ މަހުގެ 19 ގައި ރިލީޒްކޮށް، ބެލުންތެރިންގެ ބޮޑު ތަރުހީބެއް ލިބުނު ރޮމޭންޓިކް ކޮމެޑީ "ބޭޑް ނިއުސް" އެވެ.
ހިންދީ ސިނަމާގައި 80 އާއި 90 އަހަރުތަކުގައި ދިޔަޖެހި ޕަރްވީންގެ ވާހަކަ ބޮޑު ސްކްރީނަށް ގެންނަން އުޅޭ އިރު، މީގެ ކުރިން ވެސް އޭނަގެ ހަޔާތާ ގުޅުވައި ފިލްމުތަކެއް ހަދާފައިވެ އެވެ. އެގޮތުން ޑައިރެކްޓަރު މޯހިތު ސޫރީ 2006 ގައި ގެނެސްދިން "ވޯ ލަމްހޭ" ގައި ކަންގަނާ ރަނާވަތު ކުޅުނު ކެރެކްޓާ ބިނާކޮށްފައި އޮތީ ޕަރްވީންއަށެވެ.
ކާމިޔާބު އެތައް ފިލްމެއް ކުޅެފައިވާ ޕަރްވީން އުމުރުން 55 ގައި މަރުވީ 2005 ގަ އެވެ.