އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން ރައްޔިތުންގެ މަޖިލީހަށް ހުށަހެޅި ބިލު ކޮމިޓީގައި ހުއްޓުވާފައި އޮތް ސަބަބު ސާފުކޮށްދޭން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް އެދިއްޖެ އެވެ.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅި ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ 59 ދުވަސް ވެފަ އެވެ.
މި ބިލު މަޖިލީހަށް ހުށަހެޅީ މީކާއިލް ކަމަށްވާއިރު، ރައްޔިތުންގެ މަޖިލީހުގެ ރައީސަށް އޭނާ މިއަދު ފޮނުއްވި ސިޓީއެއްގައި ވަނީ މި ބިލު ކޮމިޓީގައި އޮންނަތާ 59 ދުވަސް ވެގެންދިޔައިރު ވެސް، މި ބިލުގެ އެއްވެސް މަސައްކަތެއް ކުރިއަށް ނުގޮސް، އެންމެ ކުޑަމިނުން މި ބިލުގެ މަސައްކަތް ކޮމިޓީގައި އެޖެންޑާވެސް ނުކޮށް އޮތް ސަބަބު ސާފުކޮށްދޭން އެދިފަ އެވެ.
އިޒްރޭލު މީހުންނާއި އެ ގައުމުގެ ޕާސްޕޯޓު އޮންނަ އެންމެންނަށް ރާއްޖެ ނާދެވޭ ގޮތަށް ގާނޫނަށް އިސްލާހު ގެންނަން ބިލެއް ހުށަހެޅުމުން ސަރުކާރުން ވަނީ ކޮމިޓީ މަރުހަލާގައި ބިލަށް އިސްލާހުތަކެއް ގެންނަން ނިންމާފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 39،000 އަށް ވުރެ މައްޗަށް އަރާފަ އެވެ.