ލާމަރުކަޒީ ނިޒާމު ފުނޑުފުނޑު ކުރުމުގެ މަސައްކަތް ސަރުކާރުން ފަށާފައިވާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީން މިރޭ ބޭއްވި ގައުމީ މަޖިލީހުގެ ޖަލްސާގައި ވާހަކަދައްކަމުން ފައްޔާޒު ވިދާޅުވީ ގާނޫނު އަސާސީ އަށް މިއަދު 16 އަހަރު ފުރިގެންދާއިރު، މިހާރު ފެންނަނީ ގާނޫނު އަސާސީން ލިބިދީފައިވާ ހައްގުތައް ނިގުޅައިގަތުމުގެ މަސައްކަތް ސަރުކާރުން ފަށާފައިވާ މަންޒަރު ކަމަށެވެ. އެގޮތުން ޑިމޮކްރެޓިކް ނިޒާމު ދަމަހައްޓައި ރައްޔިތުންގެ ބާރުވެރިކަން މި ގައުމުގައި ގާއިމުވެ އޮތުމަށް ބޭނުންވާ ލާމަރުކަޒީ ނިޒާމު ފުނޑުފުނޑުކޮށްލުމުގެ މަސައްކަތެއް ސަރުކާރުން ފަށައިގެން ކުރިއަށްދާ ކަމަށް ފައްޔާޒު ވިދާޅުވި އެވެ.
"މިއީ ވަރަށް ބިރުވެރި ސިގްނަލެއް އަޅުގަނޑުމެންނަށް މި ފެންނަނީ. އަޅުގަނޑުމެންނަށް އެބަ އިނގޭ މިއަދުގެ ސަރުކާރަކީ މިއޮތް ގާނޫނު އަސާސީގެ ހަމަތައް ގަބޫލުކުރައްވާ ބައެއް ނޫންކަން. ޑިމޮކްރެސީގެ ހަމަތައް ގަބޫލުކުރައްވާ ބައެއް ނޫންކަން، ލާމަރުކަޒީ ނިޒާމު އެއްގޮތަކަށް ވެސް ގަބޫލުކުރައްވާ ބައެއް ނޫންކަން،" ފައްޔާޒު ވިދާޅުވި އެވެ.
ފައްޔާޒު ވިދާޅުވީ ސަރުކާރަށް މިއަދު ލިބިފައިވާ ބާރުތަކުގެ ތެރެއިން ލާމަރުކަޒީ ނިޒާމު އެއްކޮށް ބަދަލުކޮށް، ކައުންސިލަރުންގެ ބާރުވެރިކަން ކަނޑާލައި މަރުކަޒު ކުރުމުގެ މަސައްކަތްތަކެއް ފެށިގެން ކުރިއަށްދާ ކަމަށެވެ. އަދި ސަރުކާރަށް ރާއްޖޭގެ އިގްތިސާދު މެނޭޖްކުރަން ނޭނގުމުގެ ސަބަބުން ގައުމު ނުރައްކާތެރި ދިމާލަކަށް ދާތަން ފެންނަ ކަމަށާއި އެ ކަންކަން ހައްލުކުރަން އެއްވެސް ކަހަލަ ވިސްނުމެއް، ގާބިލުކަމެއް ސަރުކާރަށް ފާއިތުވީ 9 މަސްތެރޭ ދެއްކިފައި ނެތް ކަމަށްވެސް ފައްޔާޒު ވިދާޅުވި އެވެ.
އެމްޑީޕީ އަކީ އަބަދުވެސް މިފަދަ ކަންކަމުގައި ބަސް އިއްވާނެ ޕާޓީއެއް ކަމަށާއި ސަރުކާރަށް ކަންކަން ރަނގަޅުކުރަން ޖާގަ ދިން ނަމަވެސް ތާ އަބަދަށް އެގޮތުގައި އެމްޑީޕީ ނޯންނާނެ ކަމަށްވެސް އޭނާ ވިދާޅުވި އެވެ.