ސަރުކާރުން ކަންކަމުގައި އަޑު ނޭހި ކަމަށާއި ގައުމު އަނދަވަޅަކަށް ވައްޓާލާތަން ބަލަން ތިބެވެން ދެން ނެތް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީން ރޭ ބޭއްވި ގައުމީ މަޖިލީހުގެ ޖަލްސާގައި ވާހަކަދައްކަމުން ފައްޔާޒު ވިދާޅުވީ އެމްޑީޕީގެ ބޭނުމަކަށް މިހާތަނަށް ވެފައި އޮތީ އެކި ގޮތްގޮތުން ބުނެގެން ވެސް ސަރުކާރުން އަޑު އަހާތޯ ބެލުން ކަމަށާއި ނަމަވެސް ސަލާމަތުގެ އައްސޭރިއަށް ރީއްޗަށް ގެންދެވެން އޮތް ގައުމެއް ބޮޑު އަނދަވަޅަކަށް ވައްޓާލާތަން ބަލަން އިތުރަށް ތިބެން މިހާރު ދަތިވާ ކަމަށެވެ.
އެގޮތުން އާންމު ރައްޔިތުން ވަޒީފާތަކުން ވަކިކުރަމުންދާ ކަމަށާއި ތަކެތީގެ އަގު އެތައް ގުނައަކުން ބޮޑުވަމުންދާއިރު، ކުރިއަށް އޮތް ދުވަސްތަކުގައި ކޮންޓްރެކްޓަރުންނާއި އަމިއްލަ ވިޔަފާރިތަކަށް އެމީހުންގެ ވަޒީފާތަކުގައި ތިބި މުވައްޒަފުންނަށް ވަޒީފާ ދެވޭނެ ކަމެއްވެސް ނޭނގޭ ކަމަށް ފައްޔާޒު ވިދާޅުވި އެވެ.
"އަޅުގަނޑުމެން ތައްޔާރުވާން އެބަޖެހޭ މި ނޫން ހާލަތަކަށް ސަރުކާރަށް މި ވާހަކަ އަޑު އިއްވަން،" ފައްޔާޒު ވިދާޅުވި އެވެ.
ރޭގެ ގައުމީ މަޖިލީހުގެ ބައްދަލުވުމުގައި ވާހަކަދެއްކި ހުރިހާ ބޭފުޅުން ވެސް ވަނީ ސަރުކާރު ކުންފުނިތަކުން މީހުން ވަޒީފާއިން ވަކިކުރަމުންދާތީ އާއި ތަރައްގީގެ މަޝްރޫއުތައް ހުއްޓިފައިވާތީ ކަންބޮޑުވުން ފާޅުކޮށްފަ އެވެ.
ސިޔާސީ މުވައްޒަފުން ވިޔަފައި، އިތުރު އެއްވެސް ތަނަކުން މުވައްޒަފުން ވަކި ނުކުރުމަކީ ވެރިކަމަށް އަންނަން މި ސަރުކާރުން ވީ އެއް ވައުދެވެ.