ހޮލީވުޑްގެ ސުޕަހީރޯ ކެރެކްޓާއެއް ކަމަށްވާ "ޑެޑްޕޫލް" ގެ ކޮސްޓިއުމްގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި އުޅުނު މީހަކު ފުލުހުން އަތުލައިގެންފި އެވެ.
އެ މީހުން އަތުލައިގަތީ ރޭފެ ވަގުތެއްގަ އެވެ. "ޑެޑްޕޫލް" ކޮސްޓިއުމުގައި އުޅުނު މީހާ ހުއްޓުވައިގެން، ފުލުހުން އޭނައާ މުއާމަލާތްކުރާ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި އާންމުވެފައިވެ އެވެ.
މިކަމާ ގުޅިގެން ފުލުހުން ބުނީ އެ ކޮސްޓިއުމްގައި އުޅުނީ މީހަކަށް މަރުހަބާ ކިޔަން އެއާޕޯޓަށް ދިޔަ މީހެއް ކަމަށާއި އެކަމާ ސުވާލު ކުރުމަށް ފަހު އޭނަ ދޫކޮށްލާފައިވާ ކަމަށެވެ.
ގިނަ ބައެއްގެ މެދުގައި މަގުބޫލު "ޑެޑްޕޫލް" އަކީ މާވެލްގެ ކެރެކްޓާއެކެވެ. އެ ކެރެކްޓާ ކުޅެނީ މަޝްހޫރު އެކްޓަރު ރަޔަން ރެނޮލްޑްސް އެވެ. "ޑެޑްޕޫލް" ގެ ތިން ވަނަ ފިލްމަކީ މިދިޔަ މަހުގެ 26 ގައި ރިލީޒްކުރި "ޑެޑްޕޫލް އެންޑް ވުލްވްރިން" އެވެ.