ޓޫރިޒަމް ދާއިރާ އިން ރާއްޖޭގައި އިންވެސްޓްކުރަން ބޭނުންވާ މީހުންނަށް ފަހި ފުރުސަތުތަކާއި ލުއި ގޮތްތައް ހޯދައި ދިނުމަށް މަސައްކަތް ކުރައްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
އޮސްޓްރޭލިއަން ހޮޓެލް އިންޑަސްޓްރީ ކޮންފަރެންސް އެންޑް އެގްޒިބިޝަން (އަހައިސް) އިން އިންތިޒާމްކޮށްގެން އިއްޔެ ބޭއްވި "އަހައިސް މޯލްޑިވްސް ހޮޓެލް އިންވެސްޓްމެންޓް ސަމިޓު" ގައި މިނިސްޓަރު ވިދާޅުވީ ރާއްޖޭގައި އިންވެސްޓްކުރުމުގެ މައިގަނޑު ފައިދާތަކުގެ ތެރޭގައި ހިމެނެނީ މެހެމާންދާރީގެ ދާއިރާގައި ރާއްޖޭގެ ފެންވަރު ރަނގަޅުވުމާއި ޓޫރިސްޓުން ޑިމާންޑް ކަމަށެވެ.
އެގޮތުން އިންޑިއާ ކަނޑު ސަރަޙައްދުގެ އެންމެ މަތީ މާކެޓުގެ ގޮތުގައި ރާއްޖެ ރޭންކް ކުރެވެމުން އަންނަ އިރު، އޭޑީއާރު އަދި ރެވްޕާގައި ފާހަގަކުރެވޭ ކުރިއެރުމެއް ރާއްޖޭން ދައްކުވައިދޭ ކަމަށް ވެސް މިނިސްޓަރު ވިދާޅުވި އެވެ.
ފައިސަލް ވިދާޅުވީ ދެމެހެއްޓެނިވު ގޮތަކަށް ރާއްޖޭގެ ޓޫރިޒަމް ދާއިރާ ތަރައްގީކުރުމަކީ މުސްތަގުބަލުގެ ވަރަށް ބޮޑު ތަސައްވުރެއް ކަމަށެވެ. އެހެންވެ މި ދާއިރާ އަށް އިންވެސްޓުކުރުމަށް ދެމެހެއްޓެނިވި ތަރައްޤީގެ އުސޫލުތައް ގެންގުޅޭ ފަރާތްތަކަށް އިސްކަން ދެއްވާނެ ކަމަށް ވެސް ވިދާޅުވި އެވެ.
"ޓޫރިޒަމާ ބެހޭ އާ ގާނޫނުން އިތުރު ފަސޭހަތަކަކާއި އިންވެސްޓަރުންނަށް ފުރުސަތުތައް ލިބިގެން ދާނެ." މިނިސްޓަރު ވިދާޅުވި އެވެ.
އިއްޔެ ބޭއްވި ކޮންފަރެންސްގައި ޓޫރިޒަމް ދާއިރާގެ 14 ފަރާތަކުން ބައިވެރިވެފައިވެ އެވެ.