އިންޑިއާގެ މަޝްހޫރު ކަންނާޑާ އެކްޓަރު ޔާޝްގެ އާ ފިލްމު "ޓޮކްސިކް: އަ ފެއަރީ ޓޭލް ފޯ ގްރޯން-އަޕްސް" ގެ ޝޫޓިން މިއަދު ފަށައިފި އެވެ.
މީގެ ޝޫޓިންގެ ތެރެއިން ފިލްމުގެ ޕްރޮޑިއުސަރު ވެންކަޓް ކޭ ނަރަޔަނާ އެކީ ނަގާފައިވާ ފޮޓޯއެއް ވެސް ސޯޝަލް މީޑިއާގައި ޔާޝް ހިއްސާކޮށްފައިވެ އެވެ.
"ޓޮކްސިކް" އަކީ 2022 ގައި ރިލީޒްކުރި "ކޭޖީއެފް: ޗެޕްޓާ 2" އަށް ފަހު އޭނަ ކުޅޭ ފުރަތަމަ ފިލްމެވެ.
ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި "ކޭޖިއެފް" ގެ ދެ ފިލްމަށް ފަހު، ޔާޝް މުޅިން އާ ޕްރޮޖެކްޓެއް މިދިޔަ އަހަރުގެ ޑިސެމްބަރު މަހުގެ ތެރޭގައި އިއުލާންކުރި ފަހުން ފޭނުން ތިބީ، "ޓޮކްސިކް" ބަލާހިތުން ކެތްމަދުވެފަ އެވެ.
ގީތޫ މޯހަންދާސް ޑައިރެކްޓްކުރާ މި ފިލްމު ސިނަމާތަކަށް ގެންނަން ތާވަލުކޮށްފައި އޮތީ އަންނަ އަހަރުގެ އެޕްރީލް 10 ގަ އެވެ.
ރިޕޯޓްތައް ބުނާ ގޮތުން "ޓޮކްސިކް" ގެ ލީޑް ބަތަލާ އަކީ ކިއާރާ އަދުވާނީ އެވެ. އަދި މި ފިލްމުން ކުރިން ކަރީނާ ކަޕޫރަށް ހުށަހެޅި ރޯލު އޭނަ ފަހުން ދޫކޮށްލުމާ ގުޅިގެން އެ ރޯލު ކުޅޭނީ މިދިޔަ އަހަރު ރިލީޒްކުރި ޝާހްރުކް ޚާންގެ "ޖަވާން" ގެ ދެކުނުގެ ބަތަލާ ނަޔަންތަރާ ކަމަށް ރިޕޯޓްތައް ބުނެ އެވެ.
"ޓޮކްސިކް" ގެ ޝޫޓިން މިއަދު ފެށި އިރު، މީގެ މަންޒަރުތަކެއް އިންޑިއާ އިން ބޭރުގައި ވެސް ނަގާނެ އެވެ.