އައްޑޫގެ ވިޔަފާރިވެރި ތަކުން އެންގުމަކާއި ނުލައި ކަރަންޓް ބިލް ބޮޑުކުރި މައްސަލާގައި ވިޔަފާރިވެރިން ކުރަމުންދާ އިހްތިޖާޖް އަދިވެސް ހުއްޓާ ނުލާ ކުރިއަށްގެންދާއިރު މިރޭވެސް ބައެއް ފިހާރަތައް ހުޅުވާފައިވަނީ ފާނޫޒާއި، އުއްބަތި ދިއްލައިގެންނެވެ.
މާޗް މަހުގެ ކަރަންޓް ބިލް ވިޔަފާރިތަކަށް ފޮނުވި އިރު ވަނީ ދެގުނަ ބޮޑުކޮށްފައެވެ. ކުރިން 300 ޔުނިޓަށް ވުރެން މަތީގެ ޔުނިތްތަކަށް ނަގަމުން ދިޔަ 3:50ރ ވަނީ 6 ރުފިޔާއަށް ބަދަލުކޮށްފައެވެ.
މިކަމާއި ގުޅިގެން ވިޔަފާރިވެރިން ފެނަކަ ކޯޕަރޭޝަންގެ އައްޑޫ އޮފީހުގެ ވެރިންނާއި ބައްދަލުކުރުމުން ބުނެފައިވަނީ ކަރަންޓްގެ އަގު ބޮޑު ނުކުރާ ކަމަށެވެ. އަދި ކުރިން ސަރުކާރުން ދެމުން ދިޔަ ސަބްސިޑީ ކަނޑާލުން ޔުނިޓަކަށް ޖެހޭ އަގު 6 ރުފިޔާއަށް މަތިވީކަމަށެވެ.
ފެނަކަ ކޯޕަރޭޝަނުން މިފަދަ ގޮތަކަށް ބުނެ ރައްޔިތުން "އޮޅުވާލަން" މަސައްކަތް ކުރި އިރު އައްޑޫގެ އެއްވެސް ވިޔަފާރިއަކަށް އަދި ގޭބިސީއަކަށް ސަރުކާރުން ދިން ސަބްސިޑީ ދީފައި ނުވެއެވެ. އައްޑޫ އާއި ފުވައްމުލަކުެ ރައްޔިތުންނަށް ސަބްސިޑީ ސަރުކާރުން ނުދޭ އިރު ރާއްޖޭގެ އެހެން ކަންކޮޅުތަކުގެ ރައްޔިތުންނަށް ވަނީ ސަބްސިޑީ ބަރާބަރަށްދީފައެވެ.
ވިޔަފާރިވެރިން ފެނަކަ ކޯޕަރޭޝަނުން އޮޅުން ފިލުވަން ބޭނުންވި އެއްވެސް މައުލޫމާތެއް އަދި މިހާތަނަށް އެއްވެސް ވިޔަފާރިވެރިއަކަށް ދީފައި ނުވެއެވެ. އަދި އެކަމާއި މަޝްވަރާ ކުރާކަށްވެސް ބޭނުމެއް ނޫނެވެ. ފެނަކަ ކޯޕަރޭޝަން "ހަނު" އޮވެ އަޑިއަޑިން ބައެއް ފިހާރަ ތަކާއި ހޮސްޕިޓަލުން ކަރަންޓް ކަނޑަނީއެވެ.
އެކުންފުނިން މިމަހުގެ ބިލްތައް ވިޔަފާރިވެރިނާއި ހަވާލު ކުރަން ވަނީ އެތައް ދޮގެއް ހަދާފައެވެ. ފެނަކަ ކޯޕަރޭޝަނުން ބިލް ބެހި މުވައްޒަފުންނަށް ބިރު ދައްކައިގެން އެވެނި ފިހާރައަކުން ކަރަންޓް ބިލް ހަވާލުވެ ދައްކައިފިއޭ، މިހާރު ކަރަންޓް ބިލާއި ހަވާލުނުވަނީ މިކަހަލަ ދެތިން ފިހާރައަކުން ކަމަށް ބުނެ ވަނީ ވިޔަފާރިވެރިން އޮޅުވާލަން މަސައްކަތްކޮށްފައެވެ. އޭގެ ފަހުން ގިނަ ފިހާރަތަކުން ވަނީ ކަރަންޓް ކަނޑާލާފައެވެ.
އައްޑޫގެ ގިނަ ވިޔަފާރިތަކުން ކަރަންޓް ކަޑާލިތާ ދެ ދުވަސްވާއިރު ވިޔަފާރިވެރިން ކަރަންޓާއި ނުލައި، އުއްބައްތި އާއި ފާނޫޒު ޖަހައިގެން ފިހާރަ ވަނީ ހުޅުވާފައެވެ.
ވިޔަފާރިވެރިން ބުނަމުން ދަނީ ކަރަންޓް ބިލް ބޮޑު ކުރުމުގެ މައްސަލައަކީ ސީރިއަސް މައްސަލައެއް ކަމަށެވެ. އެގޮތުން ވިޔަފާރިވެރިން ދަނީ މިކަމުގައި އާއްމު ރައްޔިތުންނަށް ލިބޭނެ ގެއްލުން ބުނެދެމުންނެވެ.
އައްޑޫގެ ބޮޑު ވިޔަފާރިވެރިއަކު ބުނީ ފެނަކައިން ކަރަންޓް ބިލް ބޮޑު ކުރިގޮތަށް ވިޔަފާރިތަކުންވެސް އެއަގު ހަމަޖައްސައިގެން ކުރިއަށް ގެންދެވިދާނެ ކަމަށެވެ. ނަމަވެސް އެގޮތަށް ކަންތައް ކޮށްފިނަމަ އަގުބޮޑުވެގެންދާނީ އާއްމު މުދަލުންނެވެ. އަދި މިކަމުގެ ހަގީގީ ގެއްލުން އޮތީ އާއްމު ރައްޔިތުންނަށް ކަމަށެވެ.
ފިހާރަތައް ފާނޫޒާއި އުއްބަތި ޖަހައިގެން ދިއްލައިގެން ތިބެ ވިޔަފާރިވެރިން ސުލްހަވެރިކަމާއި އެކު ކުރަމުންދާ އިހްތިޖާޖަކީ އާއްމު ރައްޔިތުންގެ ހައްގުގައި ކުރާ މަސައްކަތެއްކަން ބަލައިގަންނަން ޖެހެއެވެ. މިކަމަކީ އެއްވެސް ހާލެއްގައި ސިޔާސީ ކަމެއް ނޫނެވެ.
ކަރަންޓް ބިލް ބޮޑުވުމާއި އެކު އޭގެ އަސަރު އަހަރެމެން ހުރިހާ ރައްޔިތުންނަށް ކުރާނެއެވެ. މިއަދު ގައުމުގެ ކަަންކަން ހުރި ގޮތުން "ކަންމަތީ" ފިހާރަތައް ބަނގުރޫޓު ވެގެންދާއިރު އެންމެ ބޮޑު ގެއްލުމެއް ލިބޭ އެއްފަރާތަކީ އަހަރެމެން އާއްމު ރައްޔިތުންނެވެ. މިކަމާއި އަދި އެއްފަހަރު ވިސްނަވާށެވެ!