ފެންވަރަން ހުރި މީހަކު ގަދަކަމުން ފާހަނައިން ނެރެ ވަޅިއަކުން ހަމަލާދިން މީހަކު 7 އަހަރަށް ޖަލަށް ލުމަށް ހުކުމް ކޮށްފިއެވެ.
މި މައްސަލައިގައި ޕްރޮސިކިއުޓާ ޖެނެރަލްގެ އޮފީހުން، "ތޫނު އެއްޗެއް ބޭނުންކޮށްގެން މާރާމާރީ ހިންގުން" ގެ ދައުވާ އުފުލާފައިވަނީ މާލެ މ. ގޯލްޑަންލީފް އަހުމަދު ނަބީލްގެ މައްޗަށެވެ.
އޭނާގެ މައްޗަށް ދައުވާ ކޮށްފައިވަނީ 2023 އޮގަސްޓް 16 ވަނަ ދުވަހުގެ ރޭގެ ވަގުތެއްގައި އަހުމަދު ވިޝާމް ކިޔާ މީހަކު ފެންވަރަން ހުއްޓައި ފާހާނާއިން ގަދަކަމުން ނެރެ، ވަޅިއަކުން ނިތްކުރިއާއި ވާތްފަރާތުގެ ކޮޑާދިމާއިން ބުރަކަށްޓަށް ހަމަލާދީ ޒަހަމުކޮށްލާފައިވުމުންނެވެ.
މި މައްސަލައިގައި އުފުލި ދައުވާއަށް ނަބީލް އިންކާރުކުރިއިރު، ދަލަތުން ހުށަހެޅި ސިއްރު ހެކިވެރިއަކު ވަނީ ނަބީލާއި އިތުރު ދެމީހަކު އެގެއަށްވަދެ މާރާމާރި ހިންގާނެކަމަށް ބުނެ އިންޒާރު ދިނުމަށްފަހު އެގެއިން ނުކުމެގެންދިޔަ މަންޒަރު ފެނުނު ކަމަށާއި އަދި އޭގެފަހުން އަހުމަދު ނަބީލް، އަހުމަދު ވިޝާމަށް ހަމަލާދިނުމަށްފަހު ދިއުމުން ވިޝާމަށް އަނިޔާވެފައިވާ މަންޒަރު ފެނުނު ކަމަށެވެ. އަދި ދައުވާ ލިބޭ ފަރާތް އަނިޔާ ލިބުނު މީހާ އުޅޭ ގެކައިރީ އުޅޭ ސީސީޓީވީ ފުޓެޖްވެސް ހުށަހަޅާފައިވެއެވެ.
އެހެންކަމުން އަހުމަދު ނަބީލްގެ މައްޗަށް އިއްޔެ ކްރިމިނަލް ކޯޓުން ވަނީ 7 އަހަރުގެ ޖަލު ހުކުމެއް އިއްވާފައެވެ.