ރައްޔިތުންގެ މަޖިލީހުގެ މިހާރުގެ ރައީސް އަބްދުއްރަޙީމް އަބްދުﷲ ދިރިއުޅުއްވަމުން ގެންދަވާ ރަސްމީ ގެކޮޅު މުރައިދޫގޭގެ ޗީފް އޮފް ސްޓާފްގެ މަގާމަށް ނޫސްވެރިޔާ އާދަމް ހަލީމް ހަމަޖައްސައިފި އެވެ.
އޭނަ އެ މަގާމަށް ހަމަޖެއްސީ މިދިޔަ މަހުގެ 28 ގަ އެވެ. އަބްދުއްރަހީމް މުރައިދޫގެެއަށް ބަދަލުވެވަޑައިގަތީ މިދިޔަ މަހުގެ 25 ގަ އެވެ.
އެ ގޭގެ ޗީފް އޮފް ސްޓާފަކަށް އާދަމް ހަލީމް ހަމަޖެއްސި ނަމަވެސް އޭނަގެ މުސާރަ އާއި އިނާޔާތްތަކާ ގުޅޭ އެއްވެސް ތަފުސީލެއް މަޖިލީހުގެ އިދާރާއިން ހާމަކޮށްފައެއް ނުވެ އެވެ.
ލ. މުންޑު އަށް ނިސްބަތްވާ އާދަމް ހަލީމަކީ ރާއްޖޭގެ ތަޖުރިބާކާރު ނޫސްވެރިއެކެވެ. މިހާރު ހިންގަމުން އަންނަ އޮންލައިން ނޫހެއް ކަމަށްވާ "ދަ މިރާ" އަލީ އޭނަގެ ހިއްސާ އޮންނަ ނޫހެކެވެ. އާދަމް ހަލީމަކީ ކުރީގެ "އާފަތިސް" ނޫހާއި "ހަވީރު" ނޫހުގެ އިތުރުން "އަވަސް" އާއި "ސަން" އަދި ވީ މީޑިއާގައި ވެސް މަސައްކަތް ކުރައްވާފައިވާ ނޫސްވެރިއެކެވެ.
އޭނަ އަށް ނޫސްވެރިކަމުގެ ދާއިރާ އިން އާންމު ޚިދުމަތުގެ އިނާމާއި ރަން ގަލަން ވެސް ލިބިފައިވެ އެވެ.