އިންޑިއާގެ އެންމެ ބޮޑު އިދިކޮޅު ޕާޓީ، ކޮންގްރެސް ލީޑަރު ރާހުލް ގާންދީގެ އެޑިޓްކޮށްފައިވާ ފޮޓޯއެއް ސޯޝަލް މީޑިއާގައި ޕޯސްޓްކުރި މައްސަލާގައި ބީޖޭޕީ އަށް ނިސްބަތްވާ މެންބަރު ކަންގަނާ ރަނާވަތަށް ދައުވާކޮށްފި އެވެ.
އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާގައި މިހާރު ހިމާޗަލް ޕްރަދޭޝް މަންޑީ ދާއިރާ ތަމްސީލުކުރާ މަޝްހޫރު ފިލްމީ ތަރި،. ކަންގަނާ އަށް ދައުވާކުރަން ހުށަހެޅީ ސުޕްރީމް ކޯޓްގައި ވަކާލަތި ކުރައްވާ އިސް ވަކީލެއް ކަމަށްވާ ނަރެންދުރަ މިޝްރާ އެވެ.
ދައުވާކޮށްފައި ވަނީ ރާހުލްގެ އަބުރަށް ގެއްލުވައިލަން މަސައްކަތްކޮށްފައިވާ ކަމަށް ބުނެ ބަދަލަށް 40 ކްރޯޑް ރުޕީސް (18 މިލިއަން ޑޮލަރު) ވެސް ނަގައިދޭން އެދި އެވެ.
ރާހުލްގެ އަބުރަށް ހުތުރުވާ ވުރާ ގޮތަށް ކަންގަނާ އިންސްޓަގްރާމް ސްޓޯރީގައި އާންމުކުރި އެޑިޓްކޮށްފައިވާ ފޮޓޯގައި ފެންނަނީ މުސްލިމުން އަޅާ ކަހަލަ ތާކިހަލެއް އަޅައި އަދި ހިންދޫން، ދީނީ ކަމެއްގެ ގޮތުގައި ނިތްކުރި މަތީގައި ރަތް ކުލައިން ޖަހާ ޓިއްކާ ޖަހައި، ރީނދޫ އުނގުޅައި އަދި ކަރުގައި ސަލީބެއް އެލުވި ފަށެއް އަޅުވައިގެން ހުންނަ ތަނެވެ. އަދި އެ ފޮޓޯގައި ރާހުލް އަށް ރައްދުކޮށް "ނަސްލު ސާފު ނުވާ މީހަކު އެހެން މީހުންގެ ނަސްލު ހޯދަން" އުޅޭ ކަމަށް ލިޔެފައިވެ އެވެ.
ކަންގަނާ އަކީ މި ފަހުން ރާހުލް އަށް ވަރަށް ބޮޑަށް ފާޑު ކިޔަައި ބަހުގެ ހަމަލާތައް ދެމުން އަންނަ މީހެކެވެ. އެގޮތުން ދާދި ފަހުން ޔުނިއަން ބަޖެޓަށް ލޯކް ސަބާގައި އޭނަ ބަހުސް ކުރެއްވި އިރު، ރާހުލް މަސްތުވެގެން ހުންނެވި ކަމަށް ތުހުމަތުކޮށް، މަސްތުވާތަކެއްޗަށް ޓެސްޓް ކުރަން ވެސް ކަންގަނާ ގޮވާލާފައިވެ އެވެ.
އިންޑިއާގެ ކުރީގެ ބޮޑުވަޒީރު ރަޖީވް ގާންދީގެ ދަރިކަލުން، ރާހިލުގެ އެޑިޓްކޮށްފައިވާ ފޮޓޯއެއް ކަންގަނާ ޕޯސްޓްކުރި މައްސަލައިގައި އޭނަގެ މައްޗަށް ދައިވާކުރި އިރު، މީގެ ކުރިން ބޮލީވުޑްގެ ބައެއް މީހުންނާއި އަދި އެ ނޫން ވެސް އެކި ކަންކަމާ ގުޅިގެން ކަންގަނާ ދައްކާފައިވާ ވާހަކަތަކަކާ ގުޅިގެން އޭނަގެ މައްޗަށް އެތައް ދައުވާއެއްކޮށްފައިވެ އެވެ.