ބަންގްލަދޭޝް އަށް ދެވަނަ ފަހަރަށް މިނިވަންކަން ލިބިފައިވާ ކަމަށް އެ ގައުމުގެ ވަގުތީ ސަރުކާރު ހިންގުމާ ހަވާލުވެވަޑައިގަންނަވާ މުޙައްމަދު ޔޫނުސް ވިދާޅުވެއްޖެ އެވެ.
ބަންގްލަދޭޝްގެ ބޮޑުވަޒީރު ކަމުން ޝައިހް ހަސީނާ އިސްތިއުފާ ދެއްވުމަށްފަހު އަވަށްޓެރި އިންޑިއާ އަށް ވަޑައިގެންފައިވާއިރު، އެގައުމުގައި ވަގުތީ ސަރުކާރެއް އެކުލަވާލަން މިހާރު އަންނަނީ ތައްޔާރުވަމުންނެވެ.
ވަގުތީ ސަރުކާރު ހިންގުމާ ހަވާލުވެވަޑައިގަންނަވާ ޔޫނުސް މިއަދު ބަންގްލަދޭޝަށް ވަޑައިގެންނެވުމަށްފަހު ނޫސްވެރިންނާ ވާހަކަދައްކަމުން ވިދާޅުވީ މިއަދަކީ ބަންގްލަދޭޝަށް ލިބުނު އައު ނަސްރުގެ ދުވަހެއް ކަމަށާއި މިއީ އެ ގައުމަށް ދެވަނަ ފަހަރަށް މިނިވަންކަން ލިބުން ކަމަށެވެ.
އާ ސަރުކާރުގެ ފުރަތަމަ މަސައްކަތަކަށް ވާނީ ގާނޫނުގެ ބާރު ހިންގުން ކަމަށާއި އެކަން ހައްލުނުކޮށް ކުރިއަށް ފިޔަވަޅެއް ނޭޅޭނެ ކަމަށް ޔޫނުސް ވިދާޅުވި އެވެ.
އުމުރުން މިހާރު 84 އަހަރުގެ ޔޫނުސް އަކީ ނޯބެލް އިނާމު ވެސް ހާސިލުކުރައްވާފައިވާ ބޭފުޅެކެވެ. ޔޫނުސް އަކީ އެއްވެސް ޕާޓީއަކަށް ނިސްބަތްވާ ފަރާތެއް ނޫނެވެ.
ހަސީނާ އިސްތިއުފާ ދެއްވައި ގައުމުން ފިއްލެވީ އޭނަގެ ސަރުކާރާ ދެކޮޅަށް މިދިޔަ މަހުން ފެށިގެން ގިނަ އަދަދެއްގެ ބަޔަކު މަގުތަކަށް ނުކުމެ ވަރުގަދަ މުޒާހަރާތަކެއްކޮށް، ގައުމުގެ ހާލަތު ވަރަށް ބޮޑަށް ގޯސްވުމާ ގުޅިގެންނެވެ.
މިދިޔަ މަހުން ފެށިގެން ބަންގްލަދޭޝްގައި ކުރިއަށްދާ މުޒާހަރާތަކުގައި 300 އަށް ވުރެ ގިނަ މީހުން ވަނީ މަރާލާފަ އެވެ.